«Выратаваць не ўдалося». Відавочцы расказалі, што адбывалася на Заслаўскім вадасховішчы, дзе падчас стыхіі загінула дзяўчына

23 лiпеня 2023 у 1690121460
«Зеркало»

У суботу, 22 ліпеня, мінчанка Ірына Корык з сябрамі прыехала на пляж ля Заслаўскага вадасховішча. Паводле яе словаў, у нейкі момант надвор'е стала псавацца і нечакана пачало цямнець. Не прайшло і дзвюх хвілін, як ад моцнага ветру ўсё вакол «пачало ўзлятаць». Дзяўчына аказалася адной з відавочцаў моцнага ўрагану, падчас якога ўчора загінула дзяўчына, што адпачывала ў тых мясцінах. Падрабязнасці таго, што адбывалася, Ірына расказала выданню pristalica.by.

Паводле інфармацыі pristalica.by, дзве мінскія сям'і вырашылі прабавіць суботні вечар на прыродзе і выправіліся на пляж ля Заслаўскага вадасховішча. Усё ішло па плане: альтанка, прыгожы закат, водар шашлыка.

- Нічога не прадказвала бяды. Смажылі шашлыкі, спявалі песні, любаваліся заходам сонца. Затым нечакана пачало цямнець. Ужо тады разумелі, што пойдзе дождж, але вырашылі яго на месцы перачакаць. Знайшлі альтанку, у якую перанеслі ўсе рэчы. Не прайшло і дзвюх хвілін, як усё пачалося, - расказвае Ірына. - Усё пачало ўзлятаць ад моцнага ветру. Ад страху мы ўсе зажмурваліся і прыкрывалі адно аднаго. Было вельмі страшна за сваё жыццё. Праз пару хвілін мы зразумелі, што альтанка, якая стала нашай схованкай, падае на нас. У нейкі момант мне ўжо стала складана дыхаць.

Ад страху Ірына не магла нават крычаць. Пазней яна зразумела, што яе заціснула паміж сталом і лаўкай.

- Нашыя мужчыны выратавалі мяне і маю сяброўку. Яны сваімі спінамі прытрымлівалі рэшткі даху, - працягвае дзяўчына. - Самастойна выбрацца [з альтанкі] пасля шторму мы не маглі. Іншыя адпачывальнікі заўважылі нас і пабеглі на дапамогу. Яны паднялі дах, і мы змаглі выбрацца адтуль <…>. Мы ледзь засталіся жывыя і цэлыя! Але вось на суседняй палянцы, на жаль, здарылася непапраўнае - загінула зусім маладая дзяўчынка. Бачылі, што і іншыя адпачывальнікі моцна пацярпелі.

Недалёка ад Ірыны і яе сяброў адпачывала кампанія маладых людзей. Гэта былі хлопцы і дзяўчаты 18−20 гадоў. Сярод іх была і Яна Каляда. Паводле яе словаў, калі пачаўся ўраган, яны паспелі толькі схавацца ў альтанках.

- Спачатку падумалі, што гэта звычайная залева, але роўна да таго моманту, як вецер не пачаў валіць адно дрэва за адным, - расказвае Яна, з сяброўкай якой і здарылася трагедыя. - Уладу проста заваліла дрэвам. Выратаваць не ўдалося (19-гадовая дзяўчына загінула. - Заўв. рэд.). Каля 20.30 мы даведаліся, што пацярпела яшчэ адна з нас - на яе таксама звалілася дрэва. Цяпер яна ў бальніцы.

Паводле папярэдніх звестак Следчага камітэта, у суботу, 22 ліпеня, кампанія маладых людзей прыехала на пляж, каб адзначыць дзень нараджэння. У спецыяльна адведзеным месцы яны разбілі кемпінг. Падчас адпачынку надвор'е рэзка сапсавалася. Парывамі ветру вырвала дрэва, якое ўдарыла і прыціснула 19-гадовую мінчанку. Ад атрыманых траўмаў яна памерла на месцы здарэння. Распачатая крымінальная справа.

Акрамя таго, падчас буры пацярпелі яшчэ два чалавекі - 24-гадовая дзяўчына і 25-гадовы хлопец. З траўмамі рознай ступені цяжкасці яны шпіталізаваныя.