У Мінску кіраўнік буйной кампаніі напісаў 1100 каментароў на адрас Лукашэнкі, чыноўнікаў, следчых і суддзяў. Яго будуць судзіць

1 жнiўня 2023 у 1690874940
«Зеркало»

У Мінску будуць судзіць 46-гадовага жыхара горада, які пакінуў 1100 негатыўных каментароў на адрас Аляксандра Лукашэнкі, чыноўнікаў, следчых і суддзяў, паведаміла прэс-служба Следчага камітэта.

Паводле версіі ведамства, пакінутыя мужчынам паведамленні, некаторыя з якіх утрымлівалі ненарматыўную лексіку, «зняважылі гонар і годнасць» пацярпелых. Агулам было выяўлена «больш за 140 эпізодаў злачыннай дзейнасці».

Мужчыну затрымалі летась у снежні. У Следчым камітэце адзначылі, што абвінавачаны жанаты, выхоўваў сына, займаў кіраўнічую пасаду ў буйной кампаніі, якая займаецца пастаўкай камп'ютарнай тэхнікі ў Беларусь.

Дзеянні 46-гадовага мінчука кваліфікаваныя па трох артыкулах Крымінальнага кодэкса:

• ч. 1 арт. 368 (абраза Лукашэнкі - да пяці гадоў пазбаўлення волі);
• арт. 369 (публічная абраза прадстаўніка ўлады - да трох гадоў пазбаўлення волі);
• арт. 391 (абраза суддзі - да трох гадоў абмежавання волі).

З санкцыі пракурора да яго ўжытая мера стрымання ў выглядзе заключэння пад варту.