Новы кіраўнік праўладных прафсаюзаў заклікаў рабочых не думаць пра працоўнае заканадаўства

5 красавiка 2024 у 1712329380
«Зеркало»

Не задумвацца над «асновамі працоўнага, грамадзянскага і адміністрацыйнага заканадаўства» заклікаў рабочых новы кіраўнік Федэрацыі прафсаюзаў Беларусі Юрый Сянько.

Выступаючы на з'ездзе ФПБ, новы кіраўнік арганізацыі адзначыў шэраг задач, якія «будуць няўхільна выконвацца». Першая - гэта праца з моладдзю. Другая - «падтрымка чалавека працы», піша «СБ. Беларусь сегодня».

- Вельмі важна нашаму работніку, сябру прафсаюза, працаўніку вытворчасці не задумвацца над тым, ці ведае ён дакладна асновы працоўнага, грамадзянскага, адміністрацыйнага заканадаўства. Ён мусіць выконваць свае працоўныя абавязкі. Задача - абараніць яго інтарэсы, стварыць умовы без якіх-кольвек парушэнняў, - заявіў Сянько, дадаўшы, што «прафсаюзы з гонарам спраўляюцца з гэтай задачай».

Акрамя таго, новы кіраўнік ФПБ назваў сярод задач «кансалідацыю грамадства» і адстойванне інтарэсаў Беларусі на міжнароднай арэне.

Нагадаем, Юрыю Сянько 56 гадоў, па адукацыі - юрыст, спецыяліст у галіне міжнародных адносін. Ён шэсць гадоў прапрацаваў старшынёй Дзяржаўнага мытнага камітэта Беларусі. У лістападзе 2020 года быў прызначаны амбасадарам Беларусі ў Кітаі.

У лістападзе мінулага года падаў у адстаўку.