Поспехі УСУ ва Ураджайным, нізкі маральны дух і праблемы з камандаваннем у расіян у гэтым раёне. Галоўнае са зводак

14 жнiўня 2023 у 1692021000
«Зеркало»

У Генштабе УСУ заявілі, што не далі праціўніку аднавіць страчанае становішча ў раёне Андрэеўкі і Кляшчэеўкі на Бахмуцкім напрамку, на захад ад Старамаёрскага на Шахцёрскім напрамку і на ўсход ад Рабоціна - на Запарожскім. У Мінабароны Расіі сцвярджаюць, што адбілі атакі ўкраінскіх сіл на Купянскім, Данецкім, Чырвоналіманскім і Запарожскім напрамках. Расказваем, пра што яшчэ гаворыцца ў зводках штабоў і справаздачах экспертаў на 537-ы дзень вайны ва Украіне.

Генштаб УСУ: Працягнулі наступ на Мелітопальскім і Бярдзянскім напрамках

За мінулыя суткі расійскія войскі нанеслі два ракетныя, 43 авіяцыйныя ўдары і каля 55 разоў абстралялі з рэактыўных сістэм залпавага агню пазіцыі УСУ і населеныя пункты. На жаль, ёсць загінулыя і параненыя сярод цывільнага насельніцтва, у тым ліку дзеці. Пра гэта паведамляе Генштаб Узброеных сіл Украіны.

Усяго за суткі адбылося 33 баявыя сутыкненні з праціўнікам.

- На Северскім і Слабажанскім напрамках расійскія войскі з мінамётаў і артылерыі абстралялі больш за 15 населеных пунктаў Чарнігаўскай вобласці і на Харкаўшчыне.

- На Купянскім напрамку праціўнік вёў беспаспяховыя наступальныя дзеянні ў раёнах на паўднёвы ўсход ад Андрэеўкі Луганскай вобласці. Абстраляў з артылерыі і мінамётаў пяць населеных пунктаў Харкаўскай вобласці.

- На Ліманскім напрамку войска РФ нанесла авіяцыйныя ўдары ў раёнах Белагораўкі Луганскай вобласці і Данецкай вобласці. Абстраляла з артылерыі больш за 15 населеных пунктаў Луганскай і Данецкай абласцей.

- На Бахмуцкім напрамку расійскія войскі спрабавалі аднавіць страчанае становішча ў раёнах Андрэеўкі і Кляшчэеўкі Данецкай вобласці, але поспеху не мелі. Нанеслі авіяўдар у раёне Кляшчэеўкі. Абстралялі больш за 20 населеных пунктаў Данецкай вобласці.

- На Аўдзееўскім напрамку УСУ працягваюць стрымліваць наступ расійскіх войскаў у раёне Аўдзееўкі Данецкай вобласці. Праціўнік нанёс авіяўдар у раёне Аўдзееўкі. Артылерыйскім абстрэлам падвергліся сем населеных пунктаў Данецкай вобласці.

- На Мар'інскім напрамку Сілы абароны працягваюць стрымліваць наступ расійскіх войскаў у раёне горада Мар'інка Данецкай вобласці. Праціўнік нанёс авіяўдар у раёне Краснагораўкі, абстраляў больш за дзесяць населеных пунктаў Данецкай вобласці.

- На Шахцёрскім напрамку праціўнік распачаў беспаспяховыя спробы аднавіць страчанае становішча ў раёне на захад ад Старамаёрскага. Нанёс авіяўдары ў раёнах Благадатнага і Старамаёрскага, абстраляў з артылерыі больш за дзесяць населеных пунктаў Данецкай вобласці.

- На Запарожскім напрамку расіяне спрабавалі аднавіць страчанае становішча на ўсход ад Рабоціна. Нанеслі авіяўдары ў раёнах трох і абстралялі больш за 20 населеных пунктаў Запарожскай вобласці.

- На Херсонскім напрамку праціўнік нанёс авіяцыйныя ўдары ў раёнах Зялёнага Гаю, Атрадакаменкі, Белазёркі Херсонскай вобласці. Абстраляў больш за 20 населеных пунктаў Херсонскай вобласці, горад Херсон і пасёлак Іванаўка ў Мікалаеўскай вобласці.

У той жа час Сілы абароны Украіны працягваюць вядзенне наступальнай аперацыі на Мелітопальскім і Бярдзянскім напрамках, замацоўваюцца на дасягнутых рубяжах.

- Авіяцыя Сіл абароны за мінулыя суткі нанесла 12 удараў па раёнах канцэнтрацыі асабовага складу, узбраення і ваеннай тэхнікі і шэсць - па зенітна-ракетных комплексах расійскіх войскаў.

- Падраздзяленні ракетных войскаў і артылерыі пабілі два артылерыйскія сродкі на агнявых пазіцыях, зенітна-ракетны комплекс, станцыю РЭБ, сродак супрацьпаветранай абароны праціўніка.

Мінабароны Расіі: Ударылі па месцах захоўвання ўкраінскіх марскіх беспілотнікаў

У Міністэрстве абароны Расіі заявілі, што ўначы нанеслі ўдар «па месцах вытворчасці і захоўвання безэкіпажных катараў, якія выкарыстоўваюцца УСУ для тэрарыстычных атак» і пабілі ўсе цэлі.

- На Купянскім напрамку падраздзяленні Заходняй групоўкі войскаў пры падтрымцы авіяцыі і артылерыі адбілі шэсць атак і контратак УСУ ў раёнах населеных пунктаў Навасёлаўскае Луганскай і Першатраўневае, Сінькоўка і ўрочышча Манькоўка Харкаўскай вобласці.

- На Данецкім напрамку падраздзяленні Паўднёвай групоўкі войскаў пры падтрымцы штурмавой і армейскай авіяцыі адбілі шэсць атак УСУ ў раёнах населеных пунктаў Белагораўка Луганскай і Вадзяное, Краснагораўка і Невельскае Данецкай вобласці.

Акрамя таго, у раёне населенага пункта Аўдзееўка Данецкай вобласці знішчаны склад боепрыпасаў 53-й механізаванай брыгады УСУ.

- На Чырвоналіманскім напрамку падраздзяленні групоўкі войскаў «Цэнтр», авіяцыя і артылерыя за дзень адбілі дзве атакі УСУ ў раёне населенага пункта Чырвоная Дзіброва Луганскай вобласці.

- На Паўднёва-Данецкім напрамку падраздзяленні групоўкі войскаў «Усход» пры падтрымцы авіяцыі, артылерыі і цяжкіх агнямётных сістэм нанеслі паражэнне падраздзяленням УСУ ў раёнах населеных пунктаў Ураджайнае і Старамаёрскае Данецкай вобласці.

- На Запарожскім напрамку за суткі падраздзяленні расійскай групоўкі войскаў пры падтрымцы артылерыі ў раёне населенага пункта Рабоціна Запарожскай вобласці адбілі дзве атакі УСУ. Таксама спыненая дзейнасць украінскай дыверсійна-разведвальнай групы.

- На Херсонскім напрамку нанесенае агнявое паражэнне жывой сіле і ваеннай тэхніцы УСУ, у ліку іншага знішчаны самаходны мінамёт Alacran.

Усяго за суткі, паводле МА РФ, авіяцыя, ракетныя войскі і артылерыя нанеслі паражэнне жывой сіле і ваеннай тэхніцы УСУ ў 152 раёнах. У раёне населенага пункта Зялёны Гай Мікалаеўскай вобласці пабітая батарэя зенітнага ракетнага комплексу С-300.

Сродкамі СПА перахопленыя два рэактыўныя снарады сістэмы залпавага агню HIMARS. Знішчаныя 28 украінскіх беспілотных лётных апаратаў.

Інстытут па вывучэнні вайны: Расія хоча стварыць перашкоды для ўкраінскага марскога гандлю

Украінскія сілы 13 жніўня вялі контрнаступальныя аперацыі як мінімум на двух участках фронту і, як паведамляецца, прасунуліся ў заходняй частцы Данецкай - усходняй частцы Запарожскай абласцей і ў заходняй частцы Запарожскай вобласці. Пра гэта гаворыцца ў свежай справаздачы Інстытута па вывучэнні вайны (ISW).

• Як паведамілі ў Генштабе Украіны, УСУ вялі наступальныя аперацыі на Бярдзянскім і Мелітопальскім напрамках і дамагліся частковага поспеху ў раёне Рабоціна (заходняя частка Запарожскай вобласці, 13 км на поўдзень ад Арэхава).
• Некалькі расійскіх крыніц заявілі 12 жніўня, што расійскія войскі адышлі з Ураджайнага, хоць многія абвяргалі гэтыя сцверджанні, заяўляючы, што армія РФ усё яшчэ займае паўднёвую частку населенага пункта і баявыя дзеянні працягваюцца.

ISW не атрымаў пацверджання таго, што расійскія войскі цалкам адышлі з Ураджайнага, і, імаверна, цяпер займаюць пазіцыі прынамсі ў паўднёвай частцы населенага пункта.

Эксперты таксама адзначаюць, што ўкраінскія поспехі ў раёне Ураджайнага расійскія праваенныя блогеры выкарыстоўваюць, каб паскардзіцца на нізкі маральны дух сваіх салдат і праблемы з камандаваннем у гэтым раёне. Так, адзін з блогераў напісаў, што 37-я асобная гвардзейская мотастралковая брыгада (36-я агульнавайсковая армія Усходняй ваеннай акругі арміі РФ) адмовілася вылучыць танкі для падтрымкі сваёй пяхоты ва Ураджайным, матывуючы гэта тым, што танкі нібыта знішчаюцца адразу пасля заезду на агнявую пазіцыю. Пяхота ж адступіла з Ураджайнага яшчэ 10 жніўня нібыта праз тое, што ў іх больш няма асабовага складу для вядзення баявых дзеянняў. «На справе ж палова брыгады занятая распіццём алкаголю ў тыле, а афіцэры не здольныя прывесці іх у пачуццё». Ён таксама паскардзіўся, што ўвесь склад 36-й агульнавайсковай арміі «не мае жадання» змагацца за Ураджайнае, ваююць тут злучэнне «Каскад» з самаабвешчанай ДНР і 40-я брыгада марской пяхоты РФ. Гэтыя скаргі выклікалі мноства водгукаў у расійскай інфармацыйнай прасторы. Аляксандр Хадакоўскі, камандзір батальёна «Усход», які абараняўся пад Ураджайным, нагадаў словы камандуючага Паветрана-дэсантнымі войскамі генерал-палкоўніка Міхаіла Цяплінскага пра тое, што нельга перамагчы абараняючыся. Ён таксама паскардзіўся, што Расія зарана патраціла свае рэсурсы ў вайне, і цяпер неабходна зрабіць паўзу, каб назапасіць іх для новай аперацыі. На думку экспертаў, гэта сведчыць пра прызнанне таго, што абарончыя сілы Расіі ў гэтым раёне абмежаваныя.

Спыненне і прымусовы ператрус расійскім вайсковым караблём замежнага сухагруза сведчыць, што Расія імкнецца падарваць давер да часовых гандлёвых калідораў праз Чорнае мора да ўкраінскіх партоў, каб тым самым стварыць стрымлівальны эфект для цывільных марскіх перавозак ва Украіну, не прыцягваючы актывы Чарнаморскага флоту для марской блакады, адзначаюць у Інстытуце.

На што яшчэ звярнулі ўвагу эксперты:

• расійскія войскі вялі наступальныя аперацыі на лініі Купянск - Сватава і спрабавалі вярнуць страчаныя пазіцыі ў раёне Бахмута, на мяжы Данецкай і Запарожскай абласцей і на захадзе Запарожскай вобласці, а таксама, як паведамляецца, прасунуліся на некаторых участках;
• ПВК Вагнера, імаверна, скарачаецца і рэфармуецца, каб адаптавацца да дэфіцыту фінансавання пасля мяцяжу 24 чэрвеня;
• украінскія партызаны заявілі, што 13 жніўня атакавалі расійскую вайсковую базу ў акупаваным Марыупалі.