У Іспаніі некалькі чалавек зніклі без вестак і адзін загінуў праз экстрэмальнае надвор'е

30 кастрычнiка 2024 у 1730266680
Вера Караўская / «Зеркало»

У іспанскай Валенсіі абрынуўся мост, у Малазе сышоў з рэек цягнік, некалькі чалавек дагэтуль лічацца зніклымі без вестак праз удар стыхіі, які прынёс магутныя залевы, град і моцныя парывы ветру і прывёў да паводак у аўторак, 29 кастрычніка, паведамляе Euronews.

У аўторак вечарам стала вядома пра аднаго загінулага: у Валенсіі мужчына спусціўся ў гараж, каб праверыць машыну, і захрас у ліфце.

Дзяржаўнае метэаралагічнае агенцтва (AEMET) Іспаніі абвясціла найвышэйшы ўзровень трывогі ў сувязі з дажджамі ў аўтаномнай супольнасці Валенсія, дзе праз паводку на рацэ Піканья абрынуўся мост.

Дзяржаўнае агенцтва таксама выпусціла спецыяльнае папярэджанне на тэрыторыі ўсёй краіны, заклікаючы грамадзян да асцярожнасці: «Гэты аўторак - самы неспрыяльны дзень у гэтым эпізодзе, але вельмі моцныя залевы будуць працягвацца ў наступныя дні», - гаворыцца ў паведамленні.

Некалькі чалавек дагэтуль лічацца зніклымі без вестак

У той час як служба выратавання Валенсіі зарэгістравала больш за 500 здарэнняў за адзін дзень, грамадзянская гвардыя шукае некалькі чалавек, што лічацца зніклымі без вестак, у розных раёнах.

У валенсійскім муніцыпалітэце Алькудыя ўлады спрабуюць знайсці зніклага кіроўцу грузавіка, а выратавальная пажарная брыгада ў Альбасэце шукае шэсць чалавек, зніклых пасля моцных дажджоў у Летуры.

У некаторых раёнах Валенсіі ратавальнікам давялося эвакуяваць будынкі і крамы праз паводкі, выкліканыя дажджамі, якія пакінулі сляды разбурэнняў у некалькіх вёсках.

Прыпынены рух хуткасных цягнікоў паміж Мадрыдам і Валенсіяй

Праз шторм «Дана» чыгуначныя кампаніі былі вымушаныя прыпыніць у аўторак хуткасны рух паміж Мадрыдам і Валенсіяй, а таксама Валенсіяй і Барселонай. Акрамя таго, былі закрытыя некалькі дарог, у тым ліку A-7 у Пікасэнце ў напрамку Алікантэ і A-92N у Базе (Гранада).

Раней у аўторак у Малазе сышоў з рэек цягнік. У выніку інцыдэнту ніхто не пацярпеў, а пасажыры былі перасаджаныя на іншы транспарт, адпраўлены з Малагі, паведамляе Adif.

У рэгіёне Альмерыя градзіны памерам з мяч для гольфа разбурылі сотні сельскагаспадарчых аб'ектаў. У рэгіёне Валенсія могуць пацярпець апельсінавыя і аліўкавыя дрэвы.