У Мінску памерла 85-гадовая Валянціна Барадуліна, удава народнага паэта Беларусі Рыгора Барадуліна. Пра гэта «Люстэрку» паведаміла прэзідэнтка Беларускага ПЭН Таццяна Нядбай. Абставіны і дакладная дата смерці пакуль не вядомыя.
Паводле Таццяны Нядбай, Валянціна Барадуліна памерла ў Мінску на гэтым тыдні. Дакладная дата смерці і яе абставіны прэзідэнтцы ПЭН невядомыя.
Валянціна і Рыгор пазнаёміліся на філалагічным факультэце Беларускага дзяржаўнага ўніверсітэта. Яны пражылі разам больш за 50 гадоў і выгадавалі дачку Ілону. Пасля ад’езду дачкі за мяжу з імі жыла ўнучка Дамініка.
Валянціна Барадуліна стала ўдавой 2 сакавіка 2014 года. Праз год пасля смерці мужа яна апублікавала свае «непрыхарошаныя» ўспаміны пра яго. Праз пяць гадоў, у 2019-м, ад анкалагічнага захворвання пайшла з жыцця іх дачка Ілона.
Рыгор Барадулін — народны паэт Беларусі, у 2006 годзе быў намінаваны на Нобелеўскую прэмію па літаратуры. Ён выпусціў больш за 70 зборнікаў паэзіі, а таксама вядомы сваімі эсэ, перакладамі і песнямі, сярод якіх і любімая не адным пакаленнем «Трэба дома бываць часцей».
Чытайце таксама
