У дачыненні да затрыманай у снежні мінулага года культуролага, заснавальніцы Школы дзелавой культуры і этыкету Аксаны Зарэцкай распачалі крымінальную справу за арганізацыю і падрыхтоўку дзеянняў, якія груба парушаюць грамадскі парадак. Пра гэта 19 студзеня паведаміў праваабарончы цэнтр «Вясна».
Зарэцкая знаходзіцца ў СІЗА-1 на Валадарскага. Паводле інфармацыі праваабаронцаў, яе затрымалі ў канцы снежня мінулага года.
Паводле папярэдняй інфармацыі, суд над культуролагам пройдзе ў лютым. Яе будуць судзіць разам з палітвязнем, заснавальнікам кампаніі Astronim Багданам Караўцом.
Аксана Зарэцкая была чальцом асноўнага складу Каардынацыйнай рады. У чэрвені 2021 года яе затрымалі падчас прэм’еры пастаноўкі «Белый кролик, Красный кролик» і адпусцілі пасля складання пратаколу. У траўні 2021 года ў яе кватэры прайшоў ператрус.
Артыкул 342. Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх
1. Арганізацыя групавых дзеянняў, якія груба парушаюць грамадскі парадак і спалучаныя з відавочным непадпарадкаваннем законным патрабаванням прадстаўнікоў улады або пацягнулі парушэнне працы транспарту, прадпрыемстваў, установаў або арганізацый, альбо актыўны ўдзел у такіх дзеяннях пры адсутнасці прыкмет больш цяжкага злачынства — караюцца арыштам, або абмежаваннем волі на тэрмін ад двух да пяці гадоў або пазбаўленнем волі на тэрмін да чатырох гадоў.
2. Навучанне ці іншая падрыхтоўка асобаў для ўдзелу ў групавых дзеяннях, якія груба парушаюць грамадскі парадак, а таксама фінансаванне ці іншае матэрыяльнае забяспечанне такой дзейнасці пры адсутнасці прыкмет больш цяжкага злачынства — караюцца арыштам або пазбаўленнем волі на тэрмін да трох гадоў.