Прадмова да кнігі Дуніна-Марцінкевіча і два вершы часоў паўстання Каліноўскага прызнаныя «экстрэмісцкімі» матэрыяламі, паведамляе Генпракуратура.
«На заяву пракуратуры горада Мінска інфармацыйная прадукцыя ў выглядзе прадмовы Язэпа Янушкевіча да кнігі, а таксама тэксты твораў „Плывуць вятры“, „Гутарка старога дзеда“, якія прыпісваюцца Дуніну-Марцінкевічу і ўключаныя ў заключную частку пад назвай DUBIA, кнігі з серыі „Беларускі кнігазбор“ Выбраныя творы / Вінцэнт Дунін-Марцінкевіч прызнаная экстрэмісцкімі матэрыяламі», — гаворыцца ў паведамленні.
Вінцэнт Дунін-Марцінкевіч — празаік і драматург, класік беларускай літаратуры. Яго падазравалі ва ўдзеле ў паўстанні 1863−1864 гадоў і ў напісанні рэвалюцыйных пракламацый. Пэўны час быў зняволены ў мінскай турме. Аўтар оперных лібрэта «Рэкруцкі набор», «Спаборніцтва музыкаў», «Ідылія», паэм «Гапон», «Купала», вершаваных аповесцяў «Вечарніцы», «Шчароўскія дажынкі», камедый «Пінская шляхта», «Залёты» і іншых твораў.
«Выбраныя творы» Дуніна-Марцінкевіча сталі 100-й кнігай выдавецтва «Кнігазбор». Праект прысвечаны найлепшым творам мастацкай літаратуры, айчыннага літаратуразнаўства і гісторыі, пісала БЕЛТА ў 2019 годзе.
Язэп Янушкевіч — беларускі літаратуразнавец і архівіст. Пасля прэзідэнцкіх выбараў 2006-га года ён быў звольнены з Інстытута літаратуры НАН і з Беларускага навукова-даследчага інстытута дакументазнаўства і архіўнай справы. На думку навукоўца, скарачэнне з Інстытута было звязанае з яго «празмерным» — у разуменні чыноўнікаў — захапленнем спадчынай Дуніна-Марцінкевіча і іншых вядомых беларускіх літаратараў, падкрэсліла «Еўрарадыё».