Дэпартамент міграцыі Літвы пазбавіў пастаяннага віду на жыхарства беларуса, які негатыўна выказаўся пра краіну і яе грамадзян. Пра гэта паведамляе Tv3.lt.
Паводле звестак выдання, беларусу анулявалі від на жыхарства не праз яго заявы пра Літву і яе грамадзян, а за парушэнне працоўнага заканадаўства: ён задэклараваў адно месца працы, але насамрэч працаваў у іншым месцы.
З нагоды скандальнага інтэрв'ю міграцыйныя службы яшчэ кансультуюцца з паліцыяй і органамі дзяржаўнай бяспекі, сказала журналістам кіраўніца Дэпартамента міграцыі Эвеліна Гудзінскайтэ.
Нагадаем, раней Дэпартамент міграцыі Літвы пачаў расследаванне ў дачыненні да беларуса, які мае пастаянны від на жыхарства ў гэтай краіне. Прычынай стала інтэрв'ю для YouTube-канала Mylimiausia Lietuva.
У інтэрв'ю блогеру беларус заявіў, што не вучыць літоўскую, бо не паважае гэтую мову і яна яму не патрэбная. Мясцовых палітыкаў ён называў «дурнямі» і паскардзіўся, што ў Літве няма дзе адпачыць. А таксама ён расказаў, што мясцовыя жыхары яго разумеюць, але не хочуць гаварыць з ім па-руску.