Прэзідэнт Украіны Уладзімір Зяленскі ў Японіі ўдакладніў свае словы пра Бахмут, адзначыўшы, што на цяперашні момант горад абсалютна дакладна не захоплены расіянамі.
— Мы трымаемся і ваюем дзякуючы мужнасці нашых ваяроў і свайму розуму. Мы не кідаем людзей паміраць, для нас людзі — гэта скарб, гэта самае галоўнае, што ў нас ёсць.
Няма ніякіх непаразуменняў. Я дакладна разумею, што адбываецца ў Бахмуце. І мы ўсе выразна разумеем, для чаго ўсё гэта робіцца.
Я не магу дзяліцца з вамі тактычнымі поглядамі нашых вайскоўцаў… Але мы разумеем, што яшчэ трошкі, і мы будзем перамагаць.
Сёння вайскоўцы выконваюць вельмі важныя задачы, яны знаходзяцца ў Бахмуце, у якіх пунктах — я не буду дзяліцца, але гэта кажа пра тое, што Бахмут не захоплены на сёння Расійскай Федэрацыяй. Ніякіх двух ці трох тлумачэнняў гэтаму быць не можа, — цытуе Зяленскага «Украінская праўда».
Нагадаем, блытаніна ўзнікла, калі пасля пытанняў журналістаў пра тое, у чыіх руках цяпер знаходзіцца Бахмут, Зяленскі адказаў: «Думаю, не». Агенцтва Reuters напісала, што ў прэзідэнта спыталі, ці застаецца Бахмут у руках украінскага войска.
Прэс-сакратар Зяленскага Сяргей Нікіфараў заявіў, што пытанне рэпарцёра гучала: «Расіяне заявілі, што ўзялі Бахмут».
Міністэрства абароны РФ напярэдадні позна ўвечары пацвердзіла заяву Прыгожына пра захоп Бахмута і паведаміла, што ў выніку «наступальных дзеянняў штурмавых атрадаў ПВК Вагнера пры падтрымцы артылерыі і авіяцыі Паўднёвай групоўкі войскаў завершанае вызваленне Арцёмаўска (так у РФ называюць Бахмут. — Заўв. рэд.)».
Пуцін павіншаваў наймітаў ПВК Вагнера і паабяцаў узнагародзіць усіх датычных, паведамілі расійскія дзяржаўныя СМІ.
Між тым у ранішняй зводцы Генштаба УСУ паведамлялася, што «баі за горад Бахмут не спыняюцца».
«Ворагу не ўдалося акружыць Бахмут, і яны страцілі частку панавальных вышыняў вакол горада. То-бок прасоўванне нашых войскаў у прыгарадзе па флангах, якое і цяпер працягваецца, вельмі моцна ўскладняе ворагу знаходжанне ў Бахмуце. Нашыя войскі ўзялі горад у паўакружэнне, што дае нам магчымасць знішчаць ворага», — напісала ў сваім тэлеграм-канале намесніца міністра абароны Украіны Ганна Маляр. Яна дадала, што ўкраінскія абаронцы, у прыватнасці, захоўваюць кантроль над прамысловымі і інфраструктурнымі аб’ектамі і прыватным сектарам Бахмута ў раёне Самалёт.
