Заснавальніка ПВК Вагнера Яўгена Прыгожына пахавалі 29 жніўня ў Санкт-Пецярбургу. Пра гэта паведамляе ягоная прэс-служба.
«Развітанне з Яўгенам Віктаравічам адбылося ў закрытым фармаце. Ахвочыя развітацца могуць наведаць Порахаўскія могілкі», — гаворыцца ў кароткім паведамленні.
Порахаўскія могілкі знаходзяцца ў Санкт-Пецярбургу. Пра тое, што менавіта там пахаваюць Яўгена Прыгожына, загадзя не паведамлялася. Раней выданне «Фонтанка» адзначала, што Прыгожына могуць пахаваць 29 жніўня на Серафімаўскіх могілках, на якіх былі ўзмоцненыя меры бяспекі.
Сёння таксама былі пахаваныя камандзір ПВК Вагнера Дзмітрый Уткін і топ-менеджар структур Прыгожына Валерый Чакалаў.
Пазней выданню «Агентство» супрацоўнік Порахаўскіх могілак расказаў, як хавалі Яўгена Прыгожына. Цырымонія прайшла з удзелам каля 30 чалавек, людзей у вайсковай форме на ёй не было.
«Было ад 20 да 30 чалавек. Толькі блізкія і сваякі, іх я ведаю. Хвілін 40 ішла цырымонія. Усе былі ў цывільным, вайскоўцаў я не бачыў. Я працую ў галіне ўжо больш за 30 гадоў, для мяне нічога незвычайнага, проста віп-пахаванне. Яны не першыя і, хутчэй за ўсё, не апошнія», — паведаміў супрацоўнік могілак.
Пасля таго як стала вядома, дзе менавіта пахавалі Яўгена Прыгожына, да могілак пачалі сцягвацца людзі. Як піша выданне SOTA, ля могілак і на яго тэрыторыі дзяжураць супрацоўнікі паліцыі, вайсковай паліцыі, кінолагі і нават спецыялісты па размініраванні.
«Сілавікі не толькі забараняюць паркавацца і праходзіць унутр, але і сцвярджаюць, што на могілкі наведнікаў будуць пускаць толькі заўтра раніцай. Чым выкліканыя такія меры бяспекі вакол магілы кіраўніка наймітаў, не тлумачыцца», — адзначае выданне.
Крушэнне бізнес-джэта Прыгожына
Бізнес-джэт, які належаў заснавальніку ПВК Вагнера Яўгену Прыгожыну, пацярпеў крушэнне ў раёне вёскі Кужанкіна ў Цвярской вобласці ўвечары 23 жніўня. Следчы камітэт Расіі распачаў крымінальную справу наконт парушэння правілаў бяспекі руху і эксплуатацыі паветранага транспарту.
Расавіяцыя апублікавала спіс пасажыраў самалёта, які разбіўся. Сярод іх — Яўген Прыгожын, камандзір ПВК Дзмітрый Уткін і Валерый Чакалаў — кіраўнік фірмаў, звязаных з Прыгожыным.
24 жніўня прэзідэнт Расіі Уладзімір Пуцін выказаў спачуванні «ўсім, хто загінуў у авіякатастрофе з самалётам Прыгожына».
Крушэнне самалёта Прыгожына адбылося роўна праз два месяцы пасля мяцяжу заснавальніка ПВК.