Ізраільскія войскі аднавілі кантроль над усімі населенымі пунктамі на мяжы з сектарам Газа. Пра гэта паведаміў The Times of Israel прадстаўнік Арміі абароны Ізраіля Даніэль Хагары.
Спікер адзначыў, што выпадкі сутыкненняў паміж войскамі і палестынскімі баевікамі за апошнія некалькі гадзін былі «адзінкавымі». Паводле яго, цяпер ні ў адным з гарадоў баявых дзеянняў няма.
— Цалкам магчыма, што ў гэтым раёне ўсё яшчэ ёсць тэрарысты, — падкрэсліў Хагары.
Армія вывезла жыхароў 15 з 24 памежных населеных пунктаў і працягне эвакуацыю астатніх у найбліжэйшы дзень. Мяжу ў сектары Газа ахоўваюць танкамі пры падтрымцы верталётаў і беспілотнікаў.
Хагары таксама адзначыў, што за 48 гадзін ЦАХАЛ мабілізаваў 300 тысяч рэзервістаў.
Нагадаем, 7 кастрычніка баевікі ХАМАС пачалі аперацыю «Бура Аль-Аксы» — выпусцілі па Ізраілі некалькі тысяч ракет і прарваліся на тэрыторыю краіны. ХАМАС абвінавачвае ізраільскі бок у акупацыі і «апаганьванні святога месца мусульман», а таксама ў неаднаразовых уварваннях у мячэць Аль-Акса на Храмавай гары ў Ерусаліме.
Лідар вайсковага крыла руху ХАМАС Мухамед Дэф заявіў, што па віне Ізраіля загінулі і атрымалі раненні сотні палестынцаў, таксама сотні з іх знаходзяцца ў ізраільскіх турмах. Ізраіль таксама адмовіўся ад перамоваў наконт іх абмену.
Ізраільскі ўрад фактычна абвясціў пра стан вайны — задзейнічаў параграф «40-Алеф» (40-א). Такім чынам, армія атрымала поўную свабоду дзеянняў. Мінулым разам гэты параграф уводзілі ў дзеянне 50 гадоў таму, падчас «вайны Суднага дня».
Паводле звестак Арміі абароны Ізраіля, з раніцы суботы загінула больш за 700 ізраільцян, 2150 чалавек атрымалі раненні. Палестынскія ўлады паведамляюць, што ў сектары Газа ў выніку удараў у адказ загінулі 413 чалавек і 2300 атрымалі раненні. Сярод пацярпелых ёсць і двое грамадзян Беларусі.
Чытайце таксама
