Цела памерлага ў калоніі Аляксея Навальнага знаходзіцца ў моргу акруговай клінічнай бальніцы Саляхарда. Пра гэта паведамляе «Новая газета Еўропа» са спасылкай на свае крыніцы. Паводле звестак выдання, на целе знайшлі сінякі ад курчаў і непрамога масажу сэрца. Нагадаем, днём раней, 17 лютага, адвакат і маці Аляксея Навальнага не змаглі трапіць у морг Саляхарда, ім сказалі, што там няма ягонага цела.
Як паведамляецца, станам на 17 лютага ўскрыццё не праводзілася. Паводле паведамлення крыніцы, мясцовым патолагаанатамам ускрыццё рабіць забаранілі.
Нагадаем, 16 лютага ФСВП Расіі паведаміў пра смерць палітвязня Аляксея Навальнага. У паведамленні гаворыцца, што ён памёр у калоніі пасля прагулкі. Следчы камітэт РФ арганізаваў працэсуальную праверку па факце смерці апазіцыянера.
У суботу, 17 лютага, каманда палітыка пацвердзіла яго смерць.
Аляксей Навальны знаходзіўся ў ПК-3 у пасёлку Харп Ямала-Нянецкай аўтаномнай акругі Расіі, куды яго перавялі з ПК-6 ва Уладзімірскай вобласці.
Упершыню яго асудзілі на пазбаўленне волі ў лютым 2021 года. Яму прызначылі два гады і восем месяцаў калоніі агульнага рэжыму па справе «Іў Рашэ», прызнаўшы вінаватым у махлярстве. У сакавіку 2022 года яго прызналі вінаватым па іншай справе пра махлярства і абразу суддзі, прызначыўшы дзевяць гадоў калоніі строгага рэжыму.
У жніўні мінулага года яго прызналі вінаватым у стварэнні экстрэмісцкай супольнасці, закліках да экстрэмізму, стварэнні НКА, якая замахваецца на правы грамадзян, фінансаванні экстрэмізму, а таксама ва ўцягванні няпоўнагадовых у здзяйсненне небяспечных дзеянняў і рэабілітацыі нацызму. Яму прызначылі 19 гадоў пазбаўлення волі.
Чытайце таксама
