Група маладых людзей з індыйскіх штатаў Пенджаб і Хар’яна звярнулася да ўрада па дапамогу, сцвярджаючы, што іх падманам прымусілі прайсці вайсковую службу ў Расіі і адправілі на вайну з Украінай. Пра гэта паведамляе індыйская тэлекампанія NDTV.
Хлопцы запісалі відэа з просьбай пра дапамогу і адправілі яго журналістам.
У 105-секундным роліку знятыя сямёра мужчын, апранутыя ў зімовыя курткі ў стылі мілітары з капюшонамі і шапкамі. Яны стаяць у цёмным і брудным пакоі з зачыненым (і замкнутым) акном. Адзін з іх — 19-гадовы Харш — запісвае відэазварот, які тлумачыць іх сітуацыю, а таксама просіць дапамогі.
Як зразумелі журналісты NDTV, мужчыны 27 снежня з’ехалі ў Расію, каб сустрэць там Новы год. У іх былі расійскія візы на 90 дзён, аднак потым яны паехалі ў суседнюю Беларусь.
«Агент прапанаваў адвезці нас у Беларусь… Мы не ведалі, што нам патрэбная віза. Калі мы паехалі ў Беларусь (без візы), агент папрасіў у нас яшчэ грошай, а потым кінуў нас. Нас злавіла паліцыя і перадала расійскім уладам, якія прымусілі нас падпісаць дакументы. Цяпер яны (Расія) прымушаюць нас ваяваць у вайне супраць Украіны», — заявіў Харш на відэа.
Сям’я Харша паведаміла тэлеканалу, што малады чалавек паехаў шукаць працу за мяжой, і, як паведамляецца, яму сказалі, што таму было б лягчэй эміграваць у краіну на яго выбар, калі б ён паехаў праз Расію.
«Мой сын з’ехаў за мяжу 23 снежня. Ён паехаў шукаць працу і быў злоўлены ў Расіі, дзе ў яго забралі пашпарт. Ён расказаў нам, што іх злавілі расійскія вайскоўцы, якія пагражалі дзесяццю гадамі турмы і завербавалі яго. Ён сказаў, што яго прымусілі прайсці вайсковую падрыхтоўку. Я хачу, каб урад шчасліва вярнуў майго сына дадому», — расказала жанчына.
Таксама на відэа Харш расказаў, што ягоны брат заявіў, што ён прайшоў навучанне абыходжанню са зброяй і быў скіраваны ў Данецкую вобласць.
«Цяжка сказаць, будзе ён цяпер жывы ці не», — прызнаўся Харш і таксама звярнуўся з просьбай пра дапамогу да ўрада.
23-year-old man who said he is from #Gurdaspur #Punjab #GagandeepSingh called @ndtv @ndtvindia to appeal to @MEAIndia @states_mea @DrSJaishankar to help them return to India; says 7 of them who met in Russia may be deployed any time, without any training, to fight war in #Ukraine pic.twitter.com/re6eFuyY1v
— Uma Sudhir (@umasudhir) March 4, 2024
Мяркуецца, што яшчэ адзін мужчына на відэа — Гурпрыт Сінгх, сям’я якога таксама звярнулася па дапамогу.
Ягоны брат Амрыт Сінгх паведаміў тэлеканалу, што мужчын «прымусілі» пайсці на вайсковую службу, прычым, паводле яго, незразумелыя дакументы яны падпісалі ў Беларусі.
«Іх прымусілі пайсці ў войска там, бо дакументы, якія яны падпісалі ў Беларусі, былі на рускай мове. Там было напісана, што яны альбо згаджаюцца на дзесяць гадоў пазбаўлення волі, альбо ўступаюць у расійскую армію», — заявіў ён.
Адзначаецца, што Беларусь, якая залежыць ад палітычнай і эканамічнай падтрымкі Расіі, лічыцца адным з найбліжэйшых саюзнікаў Масквы. Крэмль выкарыстаў беларускую тэрыторыю як плацдарм для ўварвання ва Украіну. Зтаго часу рэгулярныя сумесныя вайсковыя вучэнні выклікалі асцярогі ў іншых краін з нагоды таго, што Мінск рыхтуецца да больш актыўнай ролі ў гэтай вайне.
Паводле звестак тэлеканала, сем мужчын на апублікаваным відэа ўваходзяць у лік амаль двух дзясяткаў чалавек, якія захраслі ў Расіі ці знаходзяцца на лініі фронту. Усе кажуць, што іх падманам прымусілі прайсці вайсковую службу.
На мінулым тыдні Міністэрства замежных справаў Індыі заявіла, што знаходзіцца ў кантакце з іншымі людзьмі, якія трапілі ў такую ж пастку. Вядома, што адзін з падманутых праз некалькі дзён пасля свайго «залічэння ў войска» быў паранены падчас бою. Ёсць таксама паведамленні, што прынамсі дзесяць грамадзян Індыі аказаліся ў такой жа трывожнай сітуацыі. Іх завабліваюць у Расію, прапаноўваючы працу ахоўнікамі ці рознарабочымі, а потым агент, як правіла, знікае. За кожнага ашуканага ён атрымлівае ганарар.
Паведамляецца, што індыйцам, якія захраслі ў Расіі, пад выглядам працы давалі падпісваць дакументы з перакладам, які ўводзіць у зман, пасля чаго прымушалі праходзіць вайсковую падрыхтоўку.
Амбасада Індыі ў Маскве звязалася з расійскімі ўладамі і спрабуе вызваліць падманутых грамадзян.