Прэм’ер-міністр Венгрыі Віктар Орбан прапанаваў Кіеву падумаць пра спыненне агню. Такая мера, на яго думку, дазволіць паскорыць мирныя перамовы.
— Вайна, у якой вы цяпер жывяце, вельмі ўплывае і на бяспеку ў Еўропе. Мы высока цэнім усе ініцыятывы пана прэзідэнта Зяленскага па дасягненні міру. Я расказаў пану прэзідэнту, што гэтыя ініцыятывы патрабуюць шмат часу — праз правілы міжнароднай дыпламатыі яны вельмі складаныя. Я папрасіў пана прэзідэнта падумаць пра тое, ці нельга пайсці трохі іншым шляхам, спыніць агонь і потым працягнуць перамовы. Прыпыненне агню магло б паскорыць тэмп перамоваў, — заявіў Віктар Орбан на прэс-канферэнцыі ў Кіеве пасля сустрэчы з Уладзімірам Зяленскім.
Кіраўнік урада Венгрыі ўпершыню пасля пачатку вайны наведвае Украіну. Гэта яго першая афіцыйная сустрэча з прэзідэнтам Зяленскім.
Віктар Орбан вядомы сваімі рэзкімі выказваннямі на адрас Украіны. Так, ён некалькі разоў заяўляў, што не верыць у яе перамогу: заклікаў краіны Захаду адмовіцца ад перспектываў прыёму Украіны ў NATO і ад патрабаванняў вяртання ёй анексаванага Крыма і на гэтых умовах заключыць мір з Расіяй. Таксама ён заклікаў ЗША і Еўрасаюз спыніць вайсковую падтрымку Украіны. І заяўляў, што Будапешт выступае супраць прыёму Украіны ў Еўрапейскі саюз.
— Мы хочам закрыць усе нашыя папярэднія рознагалоссі і сканцэнтравацца на будучыні. Мы хочам наладзіць адносіны паміж нашымі краінамі, мы хочам падпісаць глабальнае пагадненне пра супрацоўніцтва з Украінай, — заявіў сёння ў Кіеве Орбан.
На прэс-канферэнцыі ён таксама паведаміў, што яны з Зяленскім дамовіліся пра адкрыццё ўкраінскай школы ў Венрыі. Яе фінансаванне Будапешт бярэ на сябе.
Нагадаем, няпярэдадні Венгрыя да канца 2024 года ўзначаліла Раду ЕС.
