У ноч на 21 жніўня Масква зазнала адну з самых маштабных атак беспілотнікаў: расійская СПА збіла над горадам дзесяць дронаў, паведаміў мэр сталіцы РФ Сяргей Сабянін.
«Створаная эшаланаваная абарона Масквы ад варожых БПЛА дазволіла паспяхова адбіць усе атакі. Сіламі СПА Мінабароны гэтай ноччу збітыя 10 штук. Гэта адна з самых маштабных спробаў атакаваць Маскву з дапамогай беспілотнікаў за ўвесь час. Працягваем кантраляваць сітуацыю», — напісаў Сабянін у сваім тэлеграм-канале.
Паводле маскоўскага мэра, першыя некалькі беспілотнікаў былі збітыя ў гарадской акрузе Падольск. На месцы падзення абломкаў, паводле папярэдніх звестак, разбурэнняў і пацярпелых няма.
У Мінабароны Расіі заявілі пра 11 дронаў, збітых над Маскоўскай вобласцю. Як сцвярджаецца, яшчэ 23 беспілотнікі знішчаныя над Бранскай вобласцю, шэсць — над тэрыторыяй Белгародскай вобласці, тры — над Калужскай вобласцю і два — над Курскай вобласцю.
У «Расавіяцыі» паведамілі, што ўначы цягам чатырох гадзін была абмежаваная праца трох маскоўскіх аэрапортаў — «Унукава», «Дамадзедава» і «Жукоўскі».
Нагадаем, папярэдняя масавая атака дронаў на Маскву адбылася ў траўні 2023 года — тады ў Мінабароны РФ паведамілі пра восем збітых над горадам беспілотнікаў. У прыватнасці, некалькі апаратаў спрабавалі нанесці ўдар па рэзідэнцыі Уладзіміра Пуціна ў Крамлі.