У Жлобіне завялі крымінальную справу за махлярства ў дачыненні да 17-гадовага навучэнца мясцовага каледжа, які выцягнуў у мінчука буйную суму грошай, паведамляе МУС.
У сярэдзіне кастрычніка падазраваны, прадставіўшыся дзяўчынай на імя Сняжана, завёў перапіску на сайце знаёмстваў з жыхаром сталіцы. Паміж імі завязаліся рамантычныя адносіны. Неўзабаве юнак прыдумаў гісторыі пра хваробы і папрасіў дапамагчы яму матэрыяльна. Мінчук паверыў і перавёў грошы на картку.
Потым «Сняжане» зноў спатрэбілася фінансавая дапамога. Гэтым разам — на лячэнне мамы, якая «мела патрэбу ў дарагіх леках і медыцынскіх кансультацыях». Жыхар сталіцы зноў прыйшоў на дапамогу без лішніх пытанняў.
Пры гэтым на тэлефонны кантакт суразмоўніца не ішла. Тут мінчук і западозрыў нядобрае. Ён папрасіў пасію даць яму тэлефон яе бацькі, каб пагаварыць пра праблемы ў сям'і. Махляр прыкінуўся бацькам, даўшы для сувязі свой нумар.
Кавалер спыніўся, калі сума пераводаў пераваліла за 10 500 рублёў, і звярнуўся па дапамогу ў міліцыю.
Следчыя завялі крымінальную справу па факце махлярства ў буйным памеры.
Дарэчы, няпоўнагадовы судзімы за аналагічнае злачынства і крадзеж. Нанесенай шкоды ён не кампенсаваў, бо ўсе грошы траціў на стаўкі ў букмекерскіх канторах.