У Мінск увечары 27 жніўня зноў прыйшоў вялікі дождж, хоць прагнозы яго амаль не прадказвалі. Некаторыя мінчукі ходзяць басанож, а аўтамабілі пераадольваюць водныя перашкоды. У цэнтры горада тралейбусы курсуюць з перабоямі.
На відэа з цэнтра горада відаць, што ў раёне Нямігі, як звычайна, узровень вады — у раёне 10 см, ёсць і вялікая глыбокая лужына каля Дзяржпамежкамітэта і гатэля Crowne Plaza Minsk на скрыжаванні вуліц Валадарскага і Кірава.
Як піша «Точка», залева «ўдарыла» сур’ёзна, а недзе ў горадзе «машыны ўжо ператварыліся ў лодкі».
У «Мінсктрансе» паведамілі, што «ў сувязі са складанымі ўмовамі надвор’я рух грамадскага транспарту ажыццяўляецца з парушэннем графіку». Так, тралейбусы ходзяць з затрымкамі на вуліцах Свярдлова, Ульянава, Даўгабродскай, Нямізе, Партызанскім праспекце.
Раней сіноптыкі ацэньвалі імавернасць дажджу ў Мінску 27 жніўня ў 5−10%. На вечар прагназуецца +21…24°С.
Нагадаем, у Мінску налічваецца каля 100 месцаў, дзе ў перыяд моцных дажджоў імаверныя падтапленні. Мясцовыя ўлады сцвярджаюць, што месцы «патопаў» скарачаюць дзякуючы рэканструкцыі і будаўніцтву сетак ліўневай каналізацыі.
Чытайце таксама
