Служба бяспекі Украіны папрасіла сустрэчы з беларускімі калегамі. Пра гэта Аляксандр Лукашэнка заявіў журналістам на агульнавайсковым палігоне Абуз-Лясноўскі ў Брэсцкай вобласці.
«Мушу прыадкрыць сакрэт, інсайд: гэта ж СБУ два дні таму папрасіла пра сустрэчу нашых спецыялістаў. Я кажу: добра, давайце сустракацца, якія пытанні», — заявіў Лукашэнка.
Пра што супрацоўнікі Службы бяспекі Украіны хочуць пагаварыць з супрацоўнікамі Камітэта дзяржаўнай бяспекі Беларусі, ён не сказаў.
Нагадаем, напярэдадні кіраўнік КДБ Беларусі Іван Церцель заявіў пра затрыманне ўкраінскага шпіёна. Увечары на дзяржТБ паказалі прысвечаны гэтаму сюжэт.
«Грамадзянін Украіны, у якога ў нашай краіне бізнес, прыехаў з доўгім спісам даручэнняў ад ваеннай разведкі. Акрамя канкрэтных задач у ім утрымліваліся і заданні, звязаныя з маніторынгам грамадска-палітычнай сітуацыі ў краіне. Для чаго — няцяжка здагадацца. У агента таксама быў знойдзены дакумент за асабістым подпісам кіраўніка ваеннай разведкі Украіны Буданава», — паведаміў у эфіры дзяржтэлеканала вядоўца.
Галоўным фігурантам крымінальнай справы назвалі ўкраінца Паўла Купрыенку, які шэсць гадоў жыве ў Беларусі і займаецца бізнесам. Паводле версіі сілавікоў, сёлета ў Кіеве яго «завербавалі ўкраінскія спецслужбы». У эфіры паказалі кадры допыту затрыманага.