Выданне «Наша Нiва» са спасылкай на неназваных еўрапейскіх дыпламатаў паведаміла пра тое, што апошнім часам Украіна паслядоўна блакуе ўдзел Святланы Ціханоўскай, а таксама прадстаўнікоў беларускага грамадства ў сумесных мерапрыемствах з еўрапейцамі. Падобна, гэта частка закулісных дамоўленасцяў паміж Кіевам і Лукашэнкам ці спроба адгадаць жаданні апошняга, мяркуе выданне. Сваё меркаванне з гэтай нагоды «Люстэрку» выказаў старшыня камітэта Вярхоўнай рады Украіны па знешняй палітыцы і міжпарламенцкім супрацоўніцтве Аляксандр Меражко.
«Я не думаю, што Украіна спецыяльна блакуе ўдзел Ціханоўскай у дыпламатычных мерапрыемствах. Насамрэч гэта пытанне дыпламатычнага пратаколу. Для таго каб удзельнічаць у дыпламатычных мерапрыемствах, трэба мець спецыяльны статус. У дыпламатычных мерапрыемстваў свае правілы. І гэта даволі незвычайна, калі ў іх удзельнічае хтосьці, акрамя прадстаўнікоў дзяржаваў. Хоць у прынцыпе запрашэнне гасцей у нейкіх асаблівых выпадках выключаць нельга. Адносна таго, хто прадстаўляе беларускую апазіцыю, на маю суб’ектыўную думку, гэтае пытанне яшчэ не вырашанае канчаткова. Ёсць розныя версіі. Напрыклад, у нас абмяркоўваецца пытанне, каб такую ролю на сябе ўзяў полк Каліноўскага. А чаму б і не? У гісторыі быў такі прэцэдэнт — рух „Свабодная Францыя“ Шарля дэ Голя. Але гэта маё асабістае суб’ектыўнае меркаванне», — пракаментаваў Меражко.
Раней выданне «Наша Ніва» са спасылкай на неназваных еўрапейскіх дыпламатаў паведаміла пра тое, што апошнім часам Украіна паслядоўна блакуе ўдзел Святланы Ціханоўскай, а таксама прадстаўнікоў беларускага грамадства ў сумесных мерапрыемствах з еўрапейцамі.
«Падобна, гэта частка закулісных дамоўленасцяў паміж Кіевам і Лукашэнкам ці спроба адгадаць жаданні апошняга», — мяркуе выданне.
У якасці прыкладу такіх сумесных мерапрыемстваў «Наша Ніва» прыводзіць саміт Люблінскага трохвугольніка ў 2023 годзе, а таксама адсутнасць Ціханоўскай на афіцыйнай частцы святкавання 160-годдзя паўстання 1863 года ў Варшаве.