Падчас рабочай паездкі ў Мінскую вобласць Аляксандр Лукашэнка назваў умовы выкарыстання ядзернай зброі з тэрыторыі Беларусі, перадае яго прэс-служба.
Паводле яго, прычына выкарыстання ядзернай зброі з тэрыторыі Беларусі можа быць толькі адна — агрэсія супраць краіны. Ён дадаў, што гэта «зброя стрымлівання» і «наўрад ці камусьці захочацца ваяваць з краінай, у якой ёсць такая зброя».
Аляксандр Лукашэнка таксама сказаў, што хацелася б пазбегнуць сітуацый, калі давялося б выкарыстоўваць ядзерную зброю. «Не дай бог мне давядзецца прымаць рашэнне на выкарыстанне гэтай зброі ў цяперашні час. Але ніякага вагання не будзе, калі толькі супраць нас будзе агрэсія», — падкрэсліў ён.
Палітык чарговым разам нагадаў, што размяшчэнне ў Беларусі ядзернай зброі было яго просьбай і настойлівым патрабаваннем да расійскага боку, каб гарантаваць бяспеку.
«Спачатку я прасіў Пуціна. Потым я настойліва па-сяброўску запатрабаваў — вярні мне пакуль гэтую зброю [тактычную]. Мне яе дастаткова», — сказаў Лукашэнка.
На цяперашнім этапе Лукашэнка не бачыць неабходнасці размяшчэння ў Беларусі стратэгічнай ядзернай зброі, аднак «у краіне рыхтуюцца пляцоўкі і пад гэтыя ўзбраенні, яны ўсе жывыя-здаровыя, акрамя адной, таму, калі трэба, мы ў любы момант…»
Нагадаем, 25 сакавіка прэзідэнт Расіі Уладзімір Пуцін сказаў, што Масква і Мінск дамовіліся размясціць тактычную ядзерную зброю на тэрыторыі Беларусі, пра што «даўно прасіў» Аляксандр Лукашэнка. Паводле словаў прэзідэнта Расіі, будаўніцтва спецыяльнага сховішча для гэтых узбраенняў скончыцца да 1 ліпеня 2023 года.
9 чэрвеня Пуцін на сустрэчы з Лукашэнкам заявіў, што размяшчэнне расійскай ядзернай зброі ў Беларусі пачнецца адразу ж пасля завяршэння 7−8 ліпеня падрыхтоўкі збудаванняў для яго.
Міністр абароны РФ Сяргей Шайгу адзначаў, што Расія толькі размяшчае ядзерную зброю ў Беларусі, а не перадае кантроль над ёй. Таму рашэнне пра яе выкарыстанне застаецца за Масквой.