У судзе па справе палітвязня Эдуарда Бабарыкі выступіла дзяржабвінавачанне, паведаміў тэлеграм-канал штаба Віктара Бабарыкі.
Пракурор запатрабаваў прызнаць Эдуарда вінаватым і прызначыць яму 10 гадоў калоніі.
Прысуд палітвязню агучаць 5 ліпеня.
Раней бок абароны хадайнічаў пра выклік у суд у якасці сведкі бацькі абвінавачанага — Віктара Бабарыкі, пра стан здароўя якога няма ніякіх звестак больш за 60 дзён. Суд задаволіў гэтую просьбу, але невядома, ці выступіў палітвязень па справе сына.
Нагадаем, 22 траўня 2023 года Мінскі абласны суд на выязным паседжанні ў памяшканні суда Мінскага раёна пачаў разглядаць справу Эдуарда Бабарыкі — сузаснавальніка ўжо няісных краўдфандынгавых платформаў «Вулей» і MolaMola. У траўні 2020 года ён узначаліў перадвыбарчую кампанію свайго бацькі, Віктара Бабарыкі. Іх затрымалі 18 чэрвеня таго ж года. Эдуард знаходзіцца за кратамі больш за тры гады.
Ён абвінавачваецца па чатырох артыкулах КК: ч. 2 арт. 243 (Ухіленне ад выплаты падаткаў у асабліва буйным памеры), арт. 235 (Легалізацыя сродкаў, атрыманых злачынным шляхам), ч. 3 арт. 130 (Распальванне варожасці) і ч. 1 арт. 293 (Масавыя беспарадкі).
Сваёй віны Эдуард не прызнаў.
«Я не здзяйсняў ніводнага са злачынстваў, у якіх мяне абвінавачваюць. Следства не знайшло ніводнага доказу маёй віны», — сказаў ён у судзе.
Чытайце таксама
