Аляксандр Лукашэнка ў інтэрв'ю прарасійскай прапагандыстцы з Украіны Дзіяне Панчанка заявіў, што прэзідэнт Расіі Уладзімір Пуцін да вайны супраць Украіны не абмяркоўваў з ім такога развіцця падзей. Але прасіў «прыкрыць яго».
«Ну вы бачылі па тэлевізары яго выступ. Я таксама. Гэта першае. У нас не было ніколі размовы. Вось проста напярэдадні ваенных дзеянняў, што вайна пачнецца. Я вам клянуся, што ў нас не было размовы пра тое, што Расія будзе здзяйсняць нейкія дзеянні супраць Украіны», — сказаў Лукашэнка.
Паводле яго словаў, ці то за некалькі дзён, ці то за дзень да пачатку вайны ён сустракаўся з Пуціным, і той папрасіў яго «прыкрыць».
«Ён мне даслоўна сказаў — упершыню таксама пра гэта вам кажу. Ён мне кажа: „Слухай, Саша, ты ведаеш, такая сітуацыя, калі, не дай Бог, што здарыцца, ну, мы саюзнікі…“ Вядома, саюзнікі, усе ведаюць нашыя дамовы: супраць Расіі хтосьці ваюе — мы ўступаем у вайну, супраць Беларусі — яны ўступаюць у вайну, у нас адзіная армія фактычна тут створаная. „Калі раптам што здарыцца…“ Я кажу: „Слухай, што можа здарыцца?“ — „Ну, усякае можа быць. Ты прыкрый мяне, калі ласка“», — расказаў Лукашэнка.
Ён растлумачыў, як выканаў просьбу расійскага прэзідэнта.
«І ў першыя дні спецыяльнай ваеннай аперацыі, калі вы памятаеце, я зрабіў заяву, што мы не ўвязваемся ў гэты канфлікт: мы мала чым можа дапамагчы, Расія і так можа справіцца з кім заўгодна. Але страляць рускім у спіну мы не дазволім. Памятаеце гэтую фразу? Гэта было звязана вось з просьбай Пуціна: „Ты прыкрый мяне, калі ласка“. Ён баяўся, хутчэй за ўсё, удару ў спіну з Захаду», — заявіў Лукашэнка.