Урад пашырыў пералік тавараў з Латвіі, увоз якіх забаронены ў Беларусь. У спіс трапілі некаторыя найменні прадуктаў харчавання, прадукцыі легпраму і будматэрыялаў латвійскай вытворчасці. Такая мера стала адказам на закрыццё аўтамабільнага пункта пропуску «Сілене» на мяжы з Беларуссю, паведамляе прэс-служба Саўміна. Раней пра планы яшчэ больш абмежаваць імпарт не толькі з Латвіі, але таксама з Польшчы і Літвы «Люстэрку» расказалі ў аб’яднанні былых сілавікоў BELPOL.
Як гаворыцца ў паведамленні ўрада, адпаведныя змены ўнесеныя ў пастанову Саўміна ад 6 снежня 2021 г. № 700 «Аб прымяненні спецыяльных мер у дачыненні да асобных відаў тавараў», якая забараняе ўвоз і рэалізацыю ў Беларусі шэрагу прадукцыі з «недружалюбных» краін.
Цяпер чорны спіс папоўнілі асобныя прадукты з Латвіі: кава, джэмы, фруктовае жэле, мармелады, садавіна, арэхі, сокі, воды, піва, моцныя спіртныя і іншыя зброджаныя напоі.
Акрамя таго, у Беларусь нельга будзе ўвозіць калготы, панчохі, гольфы, шкарпэткі, а таксама цэглу, блокі і аналагічныя вырабы з керамікі латвійскай вытворчасці.
— Пашырэнне пераліку — мера ў адказ на рашэнне Латвіі закрыць аўтамабільны пункт пропуску «Сілене» на мяжы з Беларуссю, — паведамілі ў прэс-службе ўрада.
Пастанова ўступае ў сілу пасля яе афіцыйнага апублікавання.
Нагадаем, 19 верасня ўрад Латвіі прыняў рашэнне закрыць пункт пропуску «Сілене» (з беларускага боку — «Урбаны») «у сувязі з меркаваннямі бяспекі», з улікам «вялікай колькасці выпадкаў незаконнага перасячэння мяжы паміж Латвіяй і Беларуссю» і «неабходнасцю пераразмеркавання рэсурсаў».
Цяпер на мяжы Беларусі з Латвіяй застаўся толькі адзін дзейны пункт пропуску — «Пяцерніекі» (з беларускага боку — «Грыгароўшчына»).
У МЗС Беларусі назвалі закрыццё памежнага пераходу «Сілене» «чарговым адкрыта недружалюбным палітызаваным крокам» і паабяцалі «адрэагаваць на нематываваную блакаду грузавых і пасажырскіх патокаў, у тым ліку канкрэтнымі эканамічнымі мерамі».
Таксама нагадаем, што пра намер Саўміна яшчэ больш абмежаваць імпарт з суседніх краін «Люстэрку» нядаўна расказалі ў аб’яднанні былых сілавікоў BELPOL. Паводле іх інфармацыі, акрамя Латвіі плануецца таксама пашырыць пералік забароненых для ўвозу ў Беларусь прадуктаў з Польшчы і Літвы. У чорны спіс могуць трапіць арэхі, садавіна і сокі з яе, мінеральная і газаваная вада, этылавы спірт, спіртавыя настойкі і лікёры.
Чытайце таксама
