Рост эканомікі Беларусі больш за ўсё тармозяць дзве галіны — грузаперавозкі і ІТ-рынак. Гэта вынікае з аналізу Еўразійскага банка развіцця.
Нагадаем, у 2023 годзе ВУП Беларусі вырас на 3,9% у параўнанні з 2022-м.
«Прамысловая вытворчасць, павялічыўшыся на 7,7% гадавых, забяспечыла больш за палову прыросту ВУП. Значны ўклад быў сфармаваны гандлем (аптовы тавараабарот вырас на 13,3% гадавых, рознічны павялічыўся на 8,5% гадавых) і павелічэннем інвестыцый у асноўны капітал на 14,2% гадавых у 2023 годзе», — адзначаюць у ЕАБР.
Паводле звестак Белстата, калі рознічны гандаль прадэманстраваў рост ва ўсіх рэгіёнах і Мінску, то аптовы паказаў мінус у Магілёўскай і Гомельскай — на 16,7% і 2,6% адпаведна. У прамысловасці таксама неаднародная сітуацыя па розных рэгіёнах: у лідарах — Мінская вобласць (+18,3%), а ў аўтсайдарах — Магілёўская (+1,7%). Пры гэтым у снежні мінулага года падзенне ў прамысловасці было зафіксаванае ў Брэсцкай вобласці і Мінску да аналагічнага месяца 2022-га — на 5,5% і 5,1%.
«Стрымлівальны ўплыў на рост ВУП зрабілі грузаперавозкі (зніжэнне на 17,7% гадавых), а таксама інфармацыйныя і камп’ютарныя паслугі», — паведамляюць аналітыкі ЕАБР.
Нагадаем, чыноўнікі ў апошнія гады планамерна знішчалі IT-галіну і не прызнавалі наяўнасці праблем з адтокам спецыялістаў і кампаній. Праблемы ў грузавой галіне звязаныя ў тым ліку з уведзенымі санкцыямі Захаду супраць Беларусі і мерамі ў адказ Мінска.
У ЕАБР прагназуюць, што беларуская эканоміка ў 2024 годзе можа вырасці на 2%.
Чытайце таксама
