У чэрвені інфляцыя ў Беларусі паскорылася праз рост цэн у Расіі і актыўны спажывецкі попыт. Пра гэта паведамляе Еўразійскі банк развіцця (ЕАБР) у сваім штотыднёвым аглядзе.
У чэрвені інфляцыя ў Беларусі дасягнула 5,8% у гадавым вылічэнні, трохі павялічыўшыся ў параўнанні з 5,7% у траўні.
Цэны на прадукты харчавання выраслі на 6,4% (у траўні было 6,2%), на нехарчовыя тавары — на 4,5% (у траўні — 4,1%). У той жа час рост цэн на платныя паслугі запаволіўся да 6,6% у чэрвені ў параўнанні з 6,9% у траўні, «нягледзячы на павышэнне тарыфаў на жыллёва-камунальныя паслугі», пішуць аналітыкі. Адзначым, што да гэтага часу дакладна невядома, павысілі чыноўнікі тарыфы на ЖКП ці не.
ЕАБР адзначае, што высокая інфляцыя ў Расіі, ключавым гандлёвым партнёры Беларусі, і рост спажывецкага попыту — асноўныя фактары, якія спрыяюць росту інфляцыі.
Тым не менш прагноз ЕАБР на канец года па росце цэн- 6%.
Нагадаем, раней Нацбанк таксама заяўляў пра інфляцыйныя і дэвальвацыйныя рызыкі для беларускай эканомікі, звязаныя ў тым ліку з тым, што насельніцтва і бізнес актыўна набіраюць крэдыты. Эксперты таксама бачаць у гэтым рызыкі для нацыянальнай валюты.
Чытайце таксама
