Афіцыйнаму Мінску раяць адвярнуцца ад Расіі і стаць на бок Украіны. Пра гэта расказаў Аляксандр Лукашэнка на Рэспубліканскім педагагічным савеце 27 жніўня.
— Нам цяпер раяць, падкідваюць збоку (на мяне ўсё гэта выліваецца): «Давай тут адступі, там вызвалі». Пачынаючы адсюль і заканчваючы: «Ды плюнь ты на гэтую Расію, ды адвярніся ты ад гэтай Расіі. Давай будзеш ваяваць з Украінай супраць Расіі. А да той мяжы мы войскі NATO пад Смаленск завядзём». Даходзіць і да гэтага. Мне сёння ўносяць прапановы з усіх бакоў, якія мы прыняць не можам на 99%, — заявіў Лукашэнка, не ўдакладніўшы, ад каго паступаюць такія прапановы.
Ён падкрэсліў, што расказвае гэта для таго, каб педработнікі зразумелі, «у якой мы абстаноўцы, у якой сітуацыі жывём».
— Гэта ўсё, што я вам магу сказаць. І столькі ж я сказаць проста сёння не магу: усе астатнія пытанні — гэта мае пытанні. Зрабіце сваю справу, а я буду рабіць сваю справу разам са сваімі калегамі ва ўрадзе, найвышэйшымі службовымі асобамі, — запэўніў Лукашэнка.
Падчас Рэспубліканскага педсавета палітык таксама расказаў, што Беларусь жыве ў вельмі цяжкі перыяд.
— Ніколі вакол Беларусі не было такой складанасці, як цяпер. І краіну трэба ўтрымаць. І ўсе хочам быць суверэннымі і незалежнымі. А як яе ўтрымаць — трэба думаць усім. І быць гатовымі да гэтага. І ўсё пачынаецца з нас — настаўнікаў, — падкрэсліў палітык.