У Беларусі падоўжылі забарону на ўвоз і продаж тавараў груп кампаній Liqui Moly, Škoda Auto і Beiersdorf. Гэта прадугледжваецца пастановай урада. Цяперашняя забарона заканчваецца 31 снежня гэтага года.
Дакумент загадвае МЗС, Міністэрству антыманапольнага рэгулявання, Дзяржаўнаму мытнаму камітэту і іншым зацікаўленым бакам прыняць неабходныя меры што да рэалізацыі пастановы. У сілу яно ўступае з 1 студзеня 2025 года.
Забарону на ўвоз прадукцыі груп кампаній Beiersdorf (яе самы вядомы брэнд — Nivea), Liqui Moly і Škoda Auto ўвялі з 5 траўня 2021 года. Гэтае абмежаванне некалькі разоў падаўжалі, апошні раз — да 31 снежня 2024 года.
Забарону патлумачылі абаронай нацыянальных інтарэсаў і «недружалюбнымі дзеяннямі ў дачыненні да беларускага народа». А недружалюбнымі дзеяннямі ўлады палічылі адмову гэтых брэндаў спансараваць чэмпіянат свету па хакеі 2021 года ў выпадку яго правядзення ў Беларусі. Такое рашэнне сусветныя брэнды прынялі ў сувязі з парушэннямі ў нашай краіне правоў чалавека.
Як развівалася гісторыя з забаронай у Беларусі вядомых брэндаў
Пастанова пра забарону прадукцыі гэтых кампаній — у выніку супадзення ці не зусім выпадкова — была прынятая неўзабаве пасля таго, як брэнды адмовіліся спансараваць чэмпіянат свету па хакеі, калі ён пройдзе ў Мінску.
«Nivea Men выступае за павагу, адзінства і супраць усіх формаў дыскрымінацыі і гвалту. Бачачы цяперашнюю сітуацыю, мы вырашылі, што брэнд Nivea Men не будзе спонсарам ЧС-2021, калі ён будзе праводзіцца ў Беларусі», — паведаміла кампанія ў сацыяльных сетках.
«Мы вялікія прыхільнікі хакея. Ужо 28 гадоў з’яўляемся партнёрам чэмпіянату свету па хакеі з шайбай. Тым не менш мы таксама паважаем і прасоўваем усе дзейныя правілы па абароне правоў чалавека як фундаментальнае і агульнае патрабаванне ва ўсім свеце. Škoda адмовіцца ад спонсарства ЧС-2021, калі Беларусь атрымае права на правядзенне гэтага мерапрыемства», — заявілі ў Škoda Auto.
Заявы трох вядомых у свеце фірмаў тады набылі рэзананс. У выніку Мінск пазбавілі чэмпіянату, пакінуўшы права на яго правядзенне толькі Рызе.
Неўзабаве пасля гэтага Мінздароўя заявіла, што ў прадукцыі Nivea санітарна-эпідэміялагічная служба знайшла парушэнні. Характэрна, што да гэтага касметыка брэнда без праблем прадавалася ў краіне многія гады, а парушэнні знайшлі толькі пасля гучнай заявы кампаніі. Больш за тое, нават пасля поўнай забароны на ўвоз прадукцыі гэтых брэндаў рэшткі, у тым ліку тыя, дзе нібыта знайшлі парушэнні, распрадавалі далей.