Службы занятасці запусцілі апытанне наймальнікаў пра тое, якіх работнікаў ім не хапае. Гэта робяць, каб спрагназаваць патрэбы эканомікі ў кадрах. Сярод іншага ў працадаўцаў пытаюць пра працаўнікоў пенсійнага ўзросту.
Апытанне запусцілі з 7 красавіка, яно працягнецца да 16 чэрвеня. Каб працадаўцы змаглі выказацца на гэтую тэму, ім трэба зайсці ў асабісты кабінет на партале дзяржаўнай службы занятасці (для гэтага патрэбная электронная лічбавая пячатка) і запоўніць спецыяльную анкету.
«Дадзеныя апытання будуць выкарыстаныя для фармавання прагнозу кадравых патрэбаў эканомікі на найбліжэйшыя пяць гадоў», — адзначаюць службы занятасці.
Сярод іншага наймальнікаў у анкеце пытаюць пра месцы, якія павінныя вызваліцца праз «выбыццё работнікаў з натуральна-ўзроставых прычын — у сувязі з выхадам на пенсію». Падчас адказу на пытанне ў гэтай графе просяць адзначыць усіх работнікаў, якія ў найбліжэйшыя гады дасягнуць пенсійнага ўзросту (для жанчын гэта 58 гадоў, а для мужчын — 63). «Пры гэтым усё роўна, застаюцца працаваць у вас гэтыя супрацоўнікі ці ідуць на пенсію», — адзначаюць службы занятасці ў тлумачэнні, як запаўняць анкету.
Тым часам на 7 красавіка ў цэлым па краіне не хапае 196 376 работнікаў.
Вырашыць праблему з недахопам работнікаў у Беларусі не ўдаецца не першы год. Сярод прычын — ад’езд спецыялістаў на працу за мяжу, а таксама звальненні праз палітыку.
Чытайце таксама
