Чаму ўлады не спяшаюцца блакаваць у Беларусі YouTube, шчыра расказала блогеру Андрэю Павуку намесніца міністра сувязі і інфарматызацыі Таццяна Рускевіч.
Блогер патэлефанаваў чыноўніцы з пытаннем, калі ў нашай краіне адключаць папулярны замежны відэахостынг. На гэта чыноўніца запярэчыла, што ў выпадку блакавання беларусы «паставяць VPN» і далей будуць глядзець ролікі на YouTube.
— Але ў нас тады не будзе інструменту, каб супярэчыць і супрацьдзейнічаць усяму кепскаму, што пра нас кажуць. Рэч у тым, што YouTube — гэта вельмі добры спосаб прадаваць паслугі нашых прадпрыемстваў за межы краіны і гэтым забяспечваць працу эканомікі і выплату пенсій нашым грамадзянам, — заявіла Рускевіч, не ўдакладніўшы, наколькі вялікі ўплыў замежнага відэахостынгу на прасоўванне прадукцыі айчынных дзяржпрадпрыемстваў за мяжой.
Намесніца міністра інфарматызацыі таксама дадала, што YouTube дапамагае «ўсяму свету пра нас даведацца са станоўчага пункту гледжання» і нібыта «зрухі ўжо пайшлі».
— Таму рабіць як Расія і ад усяго адгарадзіцца — гэта дрэнная гісторыя. Трэба ўмець рызыкамі кіраваць, а не выдаляць, — заявіла Рускевіч, забыўшы пра тое, як у Беларусі масава блакуюць і прызнаюць «экстрэмісцкімі» альтэрнатыўныя СМІ і крыніцы інфармацыі.
— Дык усё ж заходнікі гэтыя нам нешта добрае могуць прапанаваць?
— У кожнай краіне ёсць вырадкі і людзі, а ёсць вельмі добрыя людзі, якія жывуць з суседзямі мірна. Ёсць палітыка краін, якія супраць нас, якія вельмі хочуць нашыя землі. Ёсць краіны, якія проста назіраюць, як жа ўсё ж развіваюцца падзеі, наколькі нашая краіна хоча мірна жыць з суседзямі: нікому не пагражае, нікому не шкодзіць, ні супраць кога ваенныя дзеянні не пачынае. І тады нават у тых краін, якія хацелі нам нашкодзіць, з’яўляюцца думкі пра тое, што, напэўна, усё ж не ўсё так проста. Калі мы адключым рэсурсы, праз якія тыя, хто хоча, атрымліваюць інфармацыю, так мы ў сябе з-пад ног крэсла выбіваем, — адказала намесніца міністра сувязі, не канкрэтызаваўшы краіны, у якіх «вырадкі» не хочуць жыць з суседзямі мірна, пагражаюць і пачынаюць ваенныя дзеянні.
На ўдакладняльнае пытанне, чаму ў Беларусі не стварылі айчынны аналаг YouTube, намесніца міністра сувязі адказала шчыра:
— Нават калі мы іх прыдумаем, іх глядзець ніхто не будзе. У нас яны, можа, і ёсць… Некаторыя ёсць… Але іх не глядзяць…
— Чаму? Нецікава ці што?
— Вось расіяне зрабілі RuTube. Ніхто ў свеце яго не глядзіць, акрамя іх (расіян. — Заўв. рэд.) саміх. Таму яны праз нас прадаюць сваю прадукцыю. Шмат што прадаецца праз нашыя кампаніі, якія ў YouTube, у TikTok…
Таццяна Рускевіч таксама падкрэсліла:
— Нельга самім сабе блакаваць жыццё. Гэта ўсё роўна, што выключыць электрычнасць, бо разеткі небяспечныя.
Андрэй Павук згадаў і айчынны відэахостынг «Видео.бел», які пазіцыянаваўся як «беларускі аналаг YouTube».
— Ён жа зусім мёртвы.
— Ну бо ніхто не хоча на ім нічога размяшчаць. Калі прадукцыю на ім размяшчаць, яна не будзе запатрабаваная, — адказала Таццяна Рускевіч.
Чытайце таксама
