Гаварыць пра пандэмію ў мінулым часе пакуль рана. Такой думкай падзяліўся загадчык кафедры інфекцыйных хвароб БДМУ, доктар медыцынскіх навук, прафесар, чалец-карэспандэнт НАН Беларусі Ігар Карпаў, піша БЕЛТА.
«COVID-19 існуе, а сам працэс убудавання інфекцыі ў сезонную структуру працягваецца і цяпер. Забываць нам пра гэтую праблему ў цяперашні час ніяк не даводзіцца. Ва ўсякім выпадку, гэта маё меркаванне, як і меркаванне, можа быць, многіх іншых дактароў», — адзначыў навуковец.
Ігар Карпаў таксама выказаў сваё меркаванне пра тэрмін «трыдэмія», які з’явіўся параўнальна нядаўна.
«Прыдумалі цікавую назву — „трыдэмія“, хоць гэта не зусім так. Калі ўзяць, напрыклад, рэспіраторную сістэму, то да яе аднародны цэлы шэраг вірусаў. Многія аўтары любяць пералічыць вялікую колькасць, калі браць мікробы, вірусы і гэтак далей. Але калі гаворка ідзе пра захворванні, то-бок пра нашыя клінічныя праблемы, праблемы чалавецтва як хворых людзей, то ў гэтым выпадку вельмі важна падкрэсліць, што гэта звычайна падліковая колькасць узбуджальнікаў. Гэта вельмі важна разумець», — сказаў ён.
Паводле навукоўца, падлік ідзе розны. Але, як правіла, гаворка пра лічбу да дзесяці.
«Асноўных, самых галоўных вірусаў звычайна яшчэ менш, таму і вымалявалася такое слова, як, напрыклад, „трыдэмія“. То-бок гэты вірус, па меры таго як змяняецца сітуацыя, страчвае актыўны анатамічны патэнцыял. Ён часткова саступае свой локус, месцазнаходжанне. Адпаведна, пачынае дзяліць гэтую самую нішу з іншымі вірусамі, якія прыходзяць. Звычайна пералічваюць вірус грыпу. Сёлета ён мае месца, у той час як летась быў практычна выцеснены актыўным пандэмічным штамам. Кажуць пра рэспіраторна-сінцытыяльны вірус — сур’ёзную праблему, як правіла, для пажылых людзей і маленькіх дзяцей з пэўнымі захворваннямі. Але гэта не тры вірусы, іх насамрэч становіцца больш. Тры асноўныя, але тым не менш усё роўна клічнік неабходна пакінуць на COVID-19», — адзначыў Ігар Карпаў.
Нагадаем, у Беларусі з сярэдзіны снежня адзначаецца пад’ём захворвання на розныя вострыя рэспіраторныя вірусныя інфекцыі, у тым ліку на каранавірус. Пры гэтым колькі беларусаў заразілася COVID-19 за апошнія некалькі месяцаў — невядома. Апошні раз Міністэрства аховы здароўя публікавала статыстыку пра захворвальнасць каранавірусам 1 ліпеня 2022 года.