Сілавікі спынілі дзейнасць ашуканскіх кол-цэнтраў на тэрыторыі Мінска. Пра гэта паведамілі ў прэс-службе Следчага камітэта.
Беларускія аператыўнікі працавалі па гэтай крымінальнай справе разам з расійскімі калегамі. Вынікам іх супрацоўніцтва стала серыя затрыманняў людзей, якія маюць дачыненне да дзейнасці міжнароднай арганізаванай злачыннай групы, чые офісы базаваліся на тэрыторыі Мінска і Масквы.
Паводле звестак следства, з лютага 2020 да студзеня гэтага года зламыснікі рабілі «халодныя званкі» і прапаноўвалі грамадзянам розных краін, у тым ліку Беларусі, сваё спрыянне ў атрыманні высокага заробку на анлайн-інвестыцыях, абяцаючы гарантаваны даход і наступную яго выплату. Пры гэтым прапанаваныя грамадзянам інтэрнэт-рэсурсы былі «фэйкавымі».
Падчас пераводу пацярпелымі грашовых сродкаў на рэкамендаваную пляцоўку зламыснікі іх выкрадалі, стваралі ілюзію даходу, а падчас спробы вываду прыбытку пераставалі выходзіць на сувязь.
Нагадаем, у лістападзе 2022 года тэму тэлефонных махляроў падняў у інтэрв'ю АНТ кіраўнік МУС Іван Кубракоў. Міністр заявіў, што за хваляй тэлефонных махлярстваў у Беларусі стаіць Украіна, і пагадзіўся з прапагандыстам Маратам Маркавым, які сказаў, што «крышаванне» тэлефонных махляроў там нібыта пастаўленае на дзяржаўны ўзровень.
Раней Іван Кубракоў расказваў, што ў асноўным усе званкі ад тэлефонных махляроў паступаюць з-за межаў Беларусі.
— У асноўным кол-цэнтры знаходзяцца ва Украіне. Мы прааналізавалі сітуацыю. Калі ў СМІ з’яўляецца інфармацыя, што падчас спецыяльнай аперацыі на тэрыторыі Украіны знікае электрычнасць, ёсць нейкія пытанні з інтэрнэтам, на тэрыторыю Беларусі не паступае ніводнага званка, — сказаў Кубракоў 14 лістапада.