Затрыманы за падрыхтоўку дыверсій у Польшчы беларус спрабаваў у 2022 годзе ўступіць у полк «Пагоня», паведамілі ў аб’яднанні беларускіх сілавікоў BYPOL.
«Касцючэнка атрымаў апошні беларускі пашпарт 21 чэрвеня 2021 года — у разгар рэпрэсій, інфармацыі пра яго ўдзел у пратэстах няма. Акрамя таго, паводле наяўных звестак, гэтая асоба праходзіла верыфікацыю 2 сакавіка 2022 года для ўступлення ў полк „Пагоня“, аднак ва Украіну так і не паехала», — паведамілі ў BYPOL.
Нагадаем, 27 траўня Агенцтва ўнутранай бяспекі (ABW) Польшчы затрымала ў Варшаве некалькі чалавек па падазрэнні ў здзяйсненні падпалаў на тэрыторыі краіны.
Затрыманні праводзілі супрацоўнікі ABW «у масках і з даўгаствольнай зброяй». Падчас ператрусу аўтамабіля былі выяўленыя «пустыя каністры, буйная сума наяўных грошай у рознай валюце, а таксама кабелі, лом і прадметы, якія нагадваюць батарэйкі».
29 траўня суд на хадайніцтва пракуратуры Вроцлава (Ніжнесілезскае ваяводства) часова змясціў іх пад варту на тры месяцы.
У ліку затрыманых аказаўся ўладальнік Renault з беларускімі дзяржнумарамі 8678 РЕ-7. Як высветліла аб’яднанне былых сілавікоў BELPOL, уладальнік аўто — жыхар Мінска 1987 года нараджэння Сцяпан Касцючэнка.
Са студзеня да ліпеня 2019 года ён працаваў спецыялістам па аптовых продажах унітарнага прадпрыемства «ПС Авто Групп», з траўня да лістапада 2020 года — спецыялістам па пасляпродажным абслугоўванні СП «Святовит».
Раней Касцючэнку асудзілі на тры гады абмежавання волі без накіравання ў папраўчую ўстанову па арт. 70 (Прызначэнне мякчэйшага пакарання, чым прадугледжваецца за такое злачынства) і арт. 205 (Крадзеж, учынены арганізаванай групай альбо ў асабліва буйным памеры) Крымінальнага кодэкса. Паводле фабулы злачынства, мужчыну палічылі вінаватым у выкраданні 35 мабільных тэлефонаў на суму 7,1 млн рублёў.
Як удалося высветліць «Позірку», у чэрвені і лістападзе 2011 года мужчына браў удзел як мінімум у двух баях па змяшаных адзінаборствах (ММА): у турнірах «Еўрапейская M-1 бітва» і «M-1 BFC 13- Мінск-Файт». Абодва баі ён прайграў.