Польскі праязны дакумент на спрошчаных для грамадзян Беларусі ўмовах можна будзе атрымаць да 31 снежня 2024 года. Гэта вынікае з праекта пастановы міністра ўнутраных справаў і адміністрацыі Польшчы, піша Цэнтр беларускай салідарнасці.
Пастанова павінная набыць моц ужо 1 ліпеня 2024 года.
«Звяртаем вашую ўвагу, што дакумент яшчэ не прыняты. На гэты момант такія нормы дзейнічаюць толькі да 30 чэрвеня 2024 года», — адзначае ЦБС.
Спрошчаны парадак выдачы праязных дакументаў для грамадзян Беларусі быў уведзены ў Польшчы пастановай Міністэрства ўнутраных справаў і адміністрацыі ў ліпені 2023 года. У адпаведнасці з ім для беларусаў уводзіліся наступныя паслабленні:
- вызваленне ад выплаты збору за выдачу праязнога дакумента для замежніка — цяпер яго памер складае 350 злотых) — гэтая мера будзе дзейнічаць бестэрмінова аж да яе адмены;
- з заявай з просьбай выдаць дакумент маглі звярнуцца таксама беларусы, якія ніколі не мелі праязнога дакумента (у першую чаргу пашпарта), — у тым ліку дзеці;
- беларусам, у адрозненне ад іншых заяўнікаў, не трэба было даказваць, што яны не могуць атрымаць пашпарт ад уладаў сваёй дзяржавы;
- з заявай з просьбай выдаць дакумент маглі звярнуцца беларусы, якія маюць у Польшчы толькі часовы від на жыхарства незалежна ад мэтаў яго выдачы.