Мы пісалі, як гэтым летам на беларуска-польскай мяжы выраслі чэргі з аўтобусаў і чаканне на мяжы моцна зацягнулася. Каб паскорыць працэс, пасажыры такіх рэйсаў перасаджваліся ў аўтобусы, бліжэйшыя да пункта пропуску. Здаецца, цяпер гэты спосаб перастаў працаваць. Расказваем.
Некаторыя пасажыры з аўтобусаў у хвасце чаргі падыходзілі да тых, што стаялі бліжэй да шлагбаўма, і прасілі перасесці. Калі былі вольныя месцы, кіроўца агучваў цану. Мяркуючы з аповедаў пасажыраў, яна вар’явалася ад 10 еўра (35 рублёў) да 40 даляраў (каля 130 рублёў). Але цяпер зрабіць гэта стала нашмат складаней.
— Ля ўезду дзяжурыць транспартная міліцыя і правярае наяўнасць чэкаў, білетаў, касавыя рапарты ў кіроўцаў. Многія баяцца браць пасажыраў, — напісаў чытач «Люстэрка».
Пра тое, што такі лайфхак больш не працуе, паведамілі і ў Міжрэгіянальнай асацыяцыі перавозчыкаў (МАП). Інфармацыю пра гэта асацыяцыі пацвердзілі ў некалькіх крыніцах.
— Як паведамляюць кіроўцы аўтобусаў, кантроль у гэтым плане ўзмацніўся. На пад’ездзе да пункта пропуску працуюць прадстаўнікі транспартнай інспекцыі і іншых кантрольных органаў. Што правяраюць? Перш за ўсё — ці адпавядае колькасць пасажыраў у салоне ведамасцям ці іншым суправаджальным дакументам, — паведамілі ў МАП і дадалі, што кіроўцам-парушальнікам «пагражае вялікі штраф».
Інфармацыю пацвердзілі ў філіяле транспартнай інспекцыі Брэсцкай вобласці, куды журналістка «Люстэрка» звярнулася пад выглядам пасажыркі.
— Так, мы будзем правяраць. Мы будзем правяраць білеты на гэты аўтобус, калі пасажыры атрымалі іх, што па чым, — паведаміў супрацоўнік і дадаў, што іх інспектары правераць, на які менавіта аўтобус набыты білет у пасажыра.
Іншы спецыяліст інспекцыі, які падключыўся да размовы, звярнуў увагу, што аплату перасадкі нельга назваць купляй білета. Паводле яго, на міжнародных рэйсах цяпер няма магчымасці купіць білет у кіроўцы і атрымаць патрэбныя дакументы.
— Я не чуў, каб у міжнародных аўтобусах так прадавалі білеты. Звычайна ў касе на вакзале, — растлумачыў суразмоўца.
Пытанне пра тое, што рабіць з доўгім чаканнем на мяжы, супрацоўнік назваў правакацыйным і прапанаваў задаць яго асабіста.
Чытайце таксама
