Дзяржтэлеканал «Беларусь 1» паказаў айцішніка Дзяніса Маркіна, які вярнуўся ў Беларусь пасля жыцця ў Іспаніі праз камісію па памілаванні. Ён расказаў пра сваё расчараванне Еўропай, але, улічваючы вядомыя выпадкі ціску на эмігрантаў, якія вярнуліся, безумоўна давяраць такім заявам складана.
Ён пераехаў у Іспанію ў 2022 годзе. Яго працадаўца прапанаваў павышэнне, добрую зарплату і поўную падтрымку рэлакацыі. Дзяніс Маркін пагадзіўся, бо вырашыў, што нельга адмаўляцца, калі выпадае такі шанец.
«Барселона, мора. Усё выглядала цудоўна, — успамінае ён. — Вялікая дапамога кампаніі ў пераездзе. Мы пагадзіліся і ў кастрычніку пераехалі з сям’ёй, сына адразу там адправілі ў школу. Тады здавалася, што гэта ўсё добра, але цяпер прыехалі, усё роўна аднагодкі яго пайшлі наперад у навучанні. Там ён вучыўся ў пятым класе, сюды мы вярнуліся, гэта чацвёрты клас, трошачкі адстаў».
Паводле яго словаў, жыццё ў Барселоне аказалася не такім прывабным, як уяўлялася на першы погляд. Маркін скардзіўся на высокія падаткі, бруд на вуліцах, вялікую колькасць бяздомных і праблемы з электрычнасцю. Яго таксама не задаволіў узровень талерантнасці да ЛГБТ-супольнасці і тое, што нават высокая зарплата ў выніку не забяспечвала жаданага ўзроўню жыцця.
«Але потым ты пачынаеш лічыць падаткі, і ўжо атрымліваецца прыкладна такі ж заробак, як мне тут [у Беларусі] плацілі. А потым, калі ўсе вылікі робіш у канцы месяца, то разумееш, што тут, нават калі атрымліваць на 30% меншую зарплату, то ўсё роўна ты багацейшы, — падлічыў ён. — Па сутнасці, ты туды прыязджаеш і потым не разумееш, што ты там робіш, бо мора ўжо не так радуе. І ты разумееш, што, у прынцыпе, у Мінску можна жыць».
Аднак уся гэтая гісторыя выклікае пытанні. Дзяржаўныя СМІ ўжо не раз публікавалі падобныя інтэрв'ю з беларусамі, якія вярнуліся, і некаторыя з іх неўзабаве аказваліся пад крымінальным пераследам. Напрыклад, у лістападзе 2023 года Ігар Неміровіч вярнуўся праз камісію па вяртанні эмігрантаў, але быў асуджаны на год калоніі за абразу Лукашэнкі. А ў снежні таго ж года Таццяна Собаль з аналагічным інтэрв'ю аказалася пад следствам па «народным» артыкуле 342 КК.