Прэзідэнт Украіны Уладзімір Зяленскі 12 снежня ў звароце да лідараў краін «Вялікай сямёркі» прапанаваў тры крокі, якія паскораць усталяванне міру ва Украіне. На наступны дзень украінскі план пракаментавалі ў Крамлі.
Прапанаваныя Уладзімірам Зяленскім «тры крокі» да міру ў Крамлі назвалі крокамі да працягу баявых дзеянняў.
«Гэта тры крокі да працягу баявых дзеянняў», — заявіў URA.RU прэс-сакратар прэзідэнта РФ Дзмітрый Пяскоў. Ён таксама параіў украінскаму боку «прыняць рэаліі, якія склаліся» і без уліку якіх «якое-кольвек прасоўванне наперад немагчымае».
Нагадаем, прэзідэнт Украіны агучыў 12 снежня лідарам краін «Вялікай сямёркі» тры крокі, якія паскораць усталяванне міру ва Украіне. Ён згадаў ваенную падтрымку, дапамогу ў захаванні фінансавай, энергетычнай і сацыяльнай стабільнасці краіны. Ён таксама прапанаваў Расіі зрабіць канкрэтныя захады па дыпламатычным урэгуляванні вайны.
«Наперадзе святы, якія адзначаюць мільярды людзей: Каляды паводле грыгарыянскага календара, Новы год, Каляды паводле юліянскага календара. Гэта час, калі нармальныя людзі думаюць пра мір, а не пра агрэсію. Я прапаную Расіі хаця б паспрабаваць даказаць, што яна здольная адмовіцца ад агрэсіі. Было б правільна менавіта на Каляды пачаць вывядзенне расійскіх войскаў з міжнародна прызнанай тэрыторыі Украіны», — заявіў Зяленскі.