Украіна не мае неабходнай колькасці ўзбраення, каб паспяхова супрацьстаяць расійскаму нашэсцю, пры такіх умовах расіяне штодня будуць адсоўваць украінскія войскі назад, заявіў прэзідэнт Уладзімір Зяленскі ў інтэрв'ю PBS, піша «Украінская праўда».
«Я кажу вам адкрыта — без гэтай дапамогі (ад саюзнікаў, у прыватнасці, ад ЗША. — Заўв. рэд.) шанцаў перамагчы ў нас не будзе. І трэба быць нашмат мацнейшым за свайго ворага — вось пра што я кажу. Сёння артылерыйскі снарад (на фронце ва ўкраінскага боку. — Заўв. рэд.) — 1 да 10 (якія ёсць у Расіі. — Заўв. рэд.). Ці можам мы так стаяць? Не. Самалётаў — 1 да 30. Як можна ваяваць? Мы ж не просім нейкай асаблівай зброі. І ніхто не просіць даць 500 ці 300 самалётаў — Расія, дарэчы, 300 самалётаў выкарыстоўвае толькі на тэрыторыі Украіны! У любым выпадку пры гэтай статыстыцы яны [Расія] нас будуць штодня штурхаць назад».
Паводле яго, каб абараняць тэрыторыі, якія цяпер пад кантролем Украіны, трэба зраўняцца з Расіяй у колькасьці снарадаў і на 10 расійскіх мець 10 з боку Украіны.
«Як можна знішчыць [ворага], план — вельмі просты. Ён зразумелы. Ён ёсць. Ёсць канкрэтная зброя, якая патрэбная, каб ісці наперад. Ёсць канкрэтная зброя, каб абараніць неба. І ёсць канкрэтная зброя, каб разблакаваць неба, каб людзі [вайскоўцы] ішлі наперад. План ёсць. І больш за тое — усе партнёры гэта маюць на руках. Усе. Гэта план таго, што нам тэхнічна вельмі патрэбнае», — падкрэсліў Зяленскі.
На пытанне, ці чакае ён, што Украіне будзе лягчэй у наступным годзе, прэзідэнт сказаў, што «лягчэй не будзе» і што ўкраінцы не думаюць пра наступны год, а думаюць пра заўтрашні дзень.
«Мы думаем пра заўтрашні дзень. Нашыя мэты значна больш жыццёвыя і больш простыя. Нам трэба жыць заўтра. Што будзе ў наступным годзе — ніхто не ведае. Мы не разумеем, якую падтрымку будзе мець Украіна, якія яшчэ войны могуць быць у свеце, што будзе з Кангрэсам ЗША (з рашэннем наконт Украіны. — Заўв. рэд.)».