Расія пачала працэс вываду міратворцаў з Нагорнага Карабаха, піша РБК са спасылкай на прэс-сакратара прэзідэнта РФ Дзмітрыя Пяскова.
Раней пра тое, што міратворцы пачалі пакідаць пункты дыслакацыі, паведамілі азербайджанскія і армянскія СМІ. У прыватнасці, армянскае выданне News.am са спасылкай на дыпламатычную крыніцу пісала, што вывад будзе весціся паэтапна.
У канцы студзеня кіраўнік МЗС Расіі Сяргей Лаўроў заявіў, што пытанне знаходжання міратворцаў Расіі ў Нагорным Карабаху ўжо не датычыць армянскага боку і з’яўляецца пытаннем двухбаковых адносін паміж Расіяй і Азербайджанам.
«У нас там [у Карабаху] сапраўды застаюцца міратворцы нават пасля таго, як усе прызналі Карабах азербайджанскай тэрыторыяй. Але пытанне гэтае ўжо не датычыць армянскага боку, гэта пытанне двухбаковых адносін паміж Расіяй і Азербайджанам», — адзначыў кіраўнік расійскай дыпламатыі.
Нагадаем, у сярэдзіне верасня Азербайджан правёў «антытэрарыстычную аперацыю», у выніку якой непрызнаная Нагорна-Карабахская Рэспубліка спыніла сваё існаванне, што скончылася яе ліквідацыяй. Расія ніяк не ўдзельнічала ва ўрэгуляванні канфлікту, заявіўшы, што гэта ўнутраная справа Азербайджана, бо баявыя дзеянні праходзяць на тэрыторыі гэтай краіны.
І да, і пасля гэтага прэм’ер-міністр Арменіі неаднаразова заяўляў пра тое, што залежнасць Арменіі ад Расіі ў сферы бяспекі была памылкай. Цяпер ён пачаў ігнараваць мерапрыемствы, якія праводзяцца на постсавецкай прасторы, і стаў часцей выязджаць на захад. У Расіі праз інфармацыйныя агенцтвы заявілі, што Пашынян «сямімільнымі крокамі ідзе шляхам Зяленскага». На расійскім тэлебачанні пачалі з’яўляцца перадачы з крытыкай армянскага прэм’ера.