Расійскія спецслужбы беспрэцэдэнтна ўзмацнілі і да таго высокі ўзровень аховы Уладзіміра Пуціна — на рэкамендацыю спецслужбаў падчас вулічных публічных мерапрыемстваў ён пачаў насіць бронекамізэльку. Пра гэта піша The Moscow Times са спасылкай на двух расійскіх чыноўнікаў і крыніцу, блізкую да Крамля.
Паводле аднаго з чыноўнікаў, насіць бронекамізэльку Пуцін пачаў у 2023 годзе на рэкамендацыю Федэральнай службы аховы і Службы бяспекі прэзідэнта.
«Сёлета 9 траўня падчас параду начальнік цалкам дакладна быў у схаванай бронекамізэльцы. І гэтая мера засцярогі, я лічу, правільная», — расказаў чыноўнік, які прысутнічаў на Краснай плошчы падчас параду.
Брытанская кансультантка па пытаннях бяспекі Джэйд Мілер на просьбу The Moscow Times вывучыла відэакадры з выступам Пуціна на парадзе 9 траўня і прыйшла да высновы, што на расійскім прэзідэнце сапраўды была бронекамізэлька.
«Пуцін ходзіць даволі скавана, і на спіне яго паліто не відаць натуральных зморшчын падчас хады і паціскання рукі вайскоўцам, — сказала Мілер. — Верхняя частка цела Пуціна выглядае ненатуральна, а яго плечы здаюцца даволі шырокімі і квадратнымі, не відаць формы спіны і лапатак».
Паводле эксперткі, з паводзін расійскага прэзідэнта можна зрабіць выснову, што пад паліто надзетае нешта, што прыносіць яму дыскамфорт падчас хады. «У шэрагу выпадкаў ён падымае і папраўляе плечы, што сведчыць пра дыскамфорт ад таго, як балістычная камізэлька сядзіць на плячах, і падчас працяглага нашэння яе вага можа выклікаць раздражненне і дыскамфорт».
«Відаць, што Пуцін трымае паліто высока зашпіленым, і відаць, што ён правярае, ці зашпіленае яно, нібыта спрабуе пераканацца, што ніхто не бачыць, што пад паліто. На маю прафесійную думку, Пуцін падчас наведвання парада носіць нейкую форму балістычнай абароны», — падсумавала Мілер.
Афіцыйна Крэмль заяўляе, што няма неабходнасці павышаць меры бяспекі для Пуціна. У прыватнасці, прэс-сакратар Дзмітрый Пяскоў, каментуючы замах на славацкага прэм’ера Роберта Фіца, казаў у сярэдзіне траўня, што меры бяспекі застаюцца на «звычайным узроўні».
The Moscow Times адзначае, што падчас удзелу ў парадзе 9 траўня і падчас ускладання вянкоў да Вечнага агню ля Магілы Невядомага салдата ў Аляксандраўскім садзе з усіх бакоў расійскага прэзідэнта атачала каля двух дзясяткаў сек’юрыці ў сонцаахоўных акулярах з партатыўнымі бронекамізэлькамі ў выглядзе партфеляў.
Адначасова з гэтым на даху Крамля, ГУМа і найбліжэйшых будынкаў знаходзіліся дзясяткі снайпераў са Службы бяспекі прэзідэнта.
Чытайце таксама
