Пасля праведзеных Дэпартаментам міграцыі Літвы праверак шэсць чалавек з расійскім грамадзянствам былі пазбаўленыя літоўскага. Гэтыя людзі не паведамілі дэпартаменту, што яны атрымалі расійскае грамадзянства, піша Delfi.
З пачатку гэтага года дэпартамент выбраў для праверкі амаль 2000 грамадзян, якія часта ездзяць у Беларусь і Расію. Высветлілася, што ў 1700 з іх ёсць падвойнае грамадзянства (Літвы і Расіі ці Літвы і Беларусі) на законных падставах або від на жыхарства ў іншай краіне.
Падчас праверкі высветлілася, што ў шасці грамадзян Літвы было падвойнае грамадзянства (Літвы і Расіі) без права на яго. Ніхто з гэтых людзей не супрацоўнічаў з Дэпартаментам міграцыі, не адгукнуўся на просьбу падаць дакументы, якія даказваюць права на падвойнае грамадзянства, таму ведамства пачало працэдуру пазбаўлення грамадзянства. У выніку міністр унутраных справаў Агне Білатайтэ падпісала загад пра пазбаўленне гэтых людзей літоўскага грамадзянства.
Паводле наяўных звестак, фактаў утойвання беларускага грамадзянства не выявілі.
Дэпартамент міграцыі адзначае, што грамадзянін Літвы, які атрымаў грамадзянства іншай краіны, мусіць цягам двух месяцаў пісьмова паведаміць пра гэта. За парушэнне парадку пагражае штраф у памеры 300−850 еўра.
Цяпер дэпартамент праводзіць праверку яшчэ некалькіх сотняў грамадзян.